Shillong: Ki dkhot ka Meghalaya Commercial Truck Owners and Driver’s Association (MCTODA), ki la ïoh jamin noh hynne ka janmiet sngi Ba-ar 11 tarik Naiwieng, hadien 4 sngi ba ki la shah kem ha ki pulit ka East Khasi Hills, halor ka jingkynnoh thaw jingkulmar ha ka jaka ba ki la pynlong ïa ka jingïakhih ha Mawryngkneng.
Mar ia mih na khyrdop ka phatok ka Shillong District Jail, kiba haiing bad ki paidbah kila kdup ieid sbak ia kine ki nongialam da ka jingkmen hadien ba kila shah set along ha kane ka taiew.
Kine ki nongïalam ka MCTODA ki kynthup ïa u President, u Bah Mosklandar Marngar, u Bah Teibor Marngar, u Bah Thrangbor Lyngdoh bad u Bah Heibor Pariat, ki la ïoh jamin noh bad la leit shaw ïa ki da kiba haïing hasem bad ki nongïalam ka kynhun ki trai trok bad draibar trok.
Haba pyrshang ban ïakren ki lad pathai khubor, na ka liang u Bah Marngar u la ong ba um lah ban kren eiei, hynrei un kren hadien ka rai paidbah ha Mawryngkneng.
Na ka liang ki nongïalam ka MCTODA ki la leit sha Mawryngkneng ban ïakynduh ïa kiwei pat ki para dkhot ban shim ïa ka rai.
Lah ban kdew ba kitei ki 4 ngut ki la shah rah ha ki pulit ha ka 6 tarik Naiwieng, bad ki pulit ki la pynngat 4 tylli ki mukotduma pyrshah ïa ki, hynrei hadien ba ki la pan jamin ha ka sngi nyngkong, hynne ka sngi ki la ïoh ban mih noh na phatok.
Ka MCTODA ka la pyllong ia ka jingiakhih ban dawa pynkiew ia ka bait dewbilat bad clinker na ki kompeni shan dewbilat bad ban pynbeit ia ka jingioh kit ia ki mar kaba long ryntih.
Ym pat treh kren u bah Moslander, yn leit kynduh shwa ia ki trai bad nongniah trok
