Shillong: U Prof Sumarbin Umdor ula ong ba ha ka por ba u leit iashim bynta ha ka jingialang ka NEHU ha Delhi ha u bnai Jymmang, u la leit kum u Finance Secretary ka skulbah bad um tip eiei ba kin thung ia u kum u Pro Vice Chancellor ka NEHU Shillong.
Haba kren halor ka jinglong jingman, u Prof. Sumarbin ula ong ba ha kine ki san bnai, la leh katba lah ban pyniaid ia ka NEHU Academic Council, ha kaba la lah ruh ban plie ia ka hostel kaba 100 seat ha ka bor kaba rit hynrei dei ban sngewthuh ba u Prof. Prabha Shankar Shukla u dang dei u VC ka NEHU.
U la iathuh ba mynshem snem ka NEHU ka ioh ka grant T. 53 klur hynrei ha kane ka snem la shah khate sha ka T.31 klur bad kane ka la ktah jur ia ka rukom pyniaid kam ha NEHU ha kiba bun ki bynta namar ba tang ban siew ia ki nongtrei ba thung contract ka la kot sha ka 40 klur eiei ha ka shi snem bad ka jingmih pat na NEHU ka long tang kumba 20 klur eiei.
U la ong ba u la leit sha Delhi ban kyrpad ban ai pisa biang ia ka NEHU bad haba leit sha Delhi hap ban pynrit kum ka khnai watla hangne ha Shillong lah ban kren heh katba mon.
La iathuh ruh ba u Prof. Shukla ula bthah ia u ban khot ia ka jingialang ka Executive Council Meeting naduh u bnai Nailur hynrei ula kyntait namar ba kam long ka jinglong jingman. Ula ong ba watla ki samla kila iakhih la shi snem ban weng ia u Prof. Shukla hynrei kim lah tangba ha kawei ka liang, kila jop namar ba um don shuh hapoh NEHU.
U Prof. Sumarlin ula ioh pdiang da ka phone na Delhi ha kaba la bthah ia u ban khot ia ka Executive Council bad ka long kaba eh ban ialeh pyrshah na kiba najrong khamtam haba kane ka skulbah NEHU ka dei kaba hap ban pan jingiarap lynter namar ba ka jingmih jongka, ka long tang 8 percent na ka jinglut baroh.
Haba kubur ia ka jingdawa ki samla pule ban long EC ha NEHU, u Prof. Sumarlin ula ong ba ka long kaba dei ban long hapoh NEHU hynrei haba don kano kano ka jingjia, lah ban pyllong shabar.
Ula ong ba dei halor ka jingmih paidbah ki samla pule ba ula phah ia ka shithi sha ka ministry ban weng ia ka jingialang ka EC.
‘Kren baheh hangne katba mon, sha Delhi hap pynrit kum khnai’, sngap ka jingbatai u Prof. Sumarbin halor ka kynrum kynram NEHU
