Shillong: Ka Shnong Sohkhmi ka don ha Hima Sohra bad ban poi sha kane ka shnong, hap ban iaid na pdeng ka Sohra hi. Hynrei kane ka shnong kam pat poi surok.
Ka jingim jong ki nongshong shnong ka la syrtok namar ba hap ban iaid kjat thop shi thop ban leit sha iew sha ki ophis bad kumjuh haba wan phai sha la shnong.
Ka shnong ka don kumba 60 tnum ïing eiei bad ka dei ka shnong kaba itynnad, kumba long lem kiwei ki shnong ha ri war, la kah ia ka da ki lum ki them, ki riat ki ram bad ki don ki kshaid ki thwei ba itynnad ha ka wahrew.
Ki nongshong shnong ki trei ki ktah ha ki kam rep kum ka sla tyrpad, sohmrit, synsar, kwai, tympew, u sohniamtra nalor kiwei pat bad ki don ruh kiba ri ngap.
Ha lynti ha shnong, ki briew ki smat bha ban thung syntiew itynnad kaba la khring ia ki khmat.
Na ka jingiakren bad ki katto katne ki nongshong shnong, kila pynpaw ba ki kwah eh ban poi ka surok sha shnong hynrei ym lah leh eiei namar ba ka shong ha u nongmihkhmat bad ka sorkar ba kin peit lem ia ki.
Kane ka shnong ka la nang paw ka kyrteng jongka, namar ba ka don ka wahrew ha kaba ki pung kiba itynnad ki la khring ia ki briew nabar ban hiar shathie bad ban kiew ia u thiep khlem jingthait tang ban ioh leit sum ha ka wah kum ha pung lyngngam, bad kiwei.
Hynrei kaba I pang met ka long ba ki briew kiba wankai, ki pynjaboh ia ka mariang da kaba bret ia ki bitor, ki plastic bad ki jaboh jabain kiba long ki nongshun ia ka mariang. Kaba donkam ka long ba ki briew ki dei ban burom ia ka mariang kaba ai ia ka dur kaba itynnad da kaba sangeh ban bret ia ki jaboh jabain kiba pynsniew dur ia ka.
Da ki kjat hap iaid thop shi thop man ka sngi, Ka shnong Sohkhmi kam pat don surok
