Bengaluru: Ka kynhun jong ki 14 ngut ki nongthoh khubor na Meghalaya bad Tripura, kiba dang don mynta ha Karnataka, ki la leit ban ia kynduh ia u Lat ka jylla, u Thawar Chand Gehlot mynta ka sngi. Ha kane ka jingleit iakynduh ia u Lat, la iadon lang u Additional Director General ka PIB Karnataka Region u SG Raveendra bad ki ophisar jong ka PIB Bengaluru.
U Lat u la pdiang sngewbha ïa kane ka kynhun bad ai khublei bad kitbok kitrwiang ia ki dkhot na kaba iadei bad ka jingleit jngoh jong ki ia ki bynta bapher bapher jong ka Jylla. U la iaroh ia ka bynta jong kum kine ki kam da ka Press Information Bureau (PIB) ban kyntiew ia ka jingiasngewthuh jingmut bad pynsuk ia jingai jingtip shaphang ki sienjam pynroi bad ki rukom treikam kiba bha tam na ka bynta ka roi ka par.
U Lat u la pynpaw ka jingkyrmen ba kane ka jingleit kan ai ïa ki nongthoh khubor ka jingsngewthuh kaba jylliew shaphang ka jingkiew jong ka Karnataka ha ki kam bapher bapher kum ki jingdon jingem, ka pule puthi, ka haw haw, ki karkhana bad ka roi ka par ha ki jaka nongkyndong. U la ban jur ia ka jingdonkam jong kum kine ki jingiatreilang ban sngewthuh ia ki jingseisoh jong ki sienjam na ka bynta ka roi ka par ha ki jaka ba pyntreikam ia ki.
Da kaba phai biang sha ki por ba u la long u Myntri ka Sorkar Pdeng uba dei khmih ia ka tnad Social Justice and Empowerment, u Lat u la kren shaphang ki jingïakynduh jong u bad u Myntri Rangbah ka Jylla Meghalaya, u Conrad Sangma. U la ban jur halor ki jingiatreilang ha kato kaba u bat ia kane ka kam bad ka jingiatreilang hapdeng jong ki na ka bynta ka roi ka par kaba ai bynta lang ia baroh bad kaba iaineh.
Ha kane ka jingïakren, u Gehlot u la kylli jingkylli shaphang ka jinglong jong ka madan ïalehkai na ka bynta ki briew kiba don jingduna ha ki dkhot met, ka projek kaba la sdang ha ka por ba u long u Myntri Sorkar Pdeng. U la pynkynmaw ba la ai jaka da ka Sorkar Meghalaya na ka bynta kane ka kam bad u la pynpaw ia ka jingkyrmen ba kane ka projek ka la iaid shaphrang, da kaba kdew ïa ka lad jong kane ka kam ban kyntiew ïa ki para-sport bad ban pynkupbor ïa ki nongïalehkai kiba don jingduna ha ki dkhot met lyngba ki lad ïalehkai kiba biang bha.
Halor kane, u heh ophisar uba la leit ryngkat bad ka kynhun u la pyntip ia u Lat ba kane ka projek ka la iaid shaphrang.
U Lat u la pynpaw shuh shuh ba kum kine ki jingleit jngoh ki iarap ban wanrah ia ka jingiadei hapdeng ki jylla, ban kyntiew ia ka jingsngewthuh shaphang ki jingjop ha ka thain bad ban kyntiew ia ka jingiadei hapdeng ki lad pathai khubor bad ki tnad sorkar.
U la ai jingmut ruh ba dei ban pynshlur ïa ki kynhun kiba kum kine na Karnataka ban leit jngoh ïa ki jylla jong ka thaiñ shatei lammihngi, da kaba pynpaw ba kum kine ki kam kin pyni ïa ka roi ka par kaba dang jia ha kane ka thaiñ bad kan kyntiew ïa ka jingïatylli jong ka ri lyngba ka jingïasngewthuh jingmut bad jingïatreilang kaba kham jylliew.
Leit ki nongthoh khubor na Meghalaya bad Tripura ia u Lat ka Karnataka ha Bengaluru
