Amlarem:Ka skul Mang Hai Ryum Higher Secondary School, Amlarem, West Jaintia Hills ka la rakhe ïa ka Silver Jubilee (2000–2025) ha ka 17 tarik u Risaw, 2025 hapoh ka phang “Da ka Jingisynei U Blei Ngi Ieng, Bad Na Ka Bynta Ka Burom Jong U Ngi San.” Kane ka jingrakhe ka la long ka dak jong ka jingiaid lynti kaba jop, ka jingshaniah bad ka jingai mynsiem jong ka skul ha kine ki 25 snem ban kyntiew ïa ka pule puthi bad ka jingïarap ïa ka imlang sahlang.
La pynshongkun ïa kane ka sngi da ka jingwan ïashim bynta jong u Hon’ble Shri Lahkmen Rymbui, Myntri ba dei peit ïa ka Pule Puthi, Aiñ, Revenue & Disaster Management bad Information & Public Relations (IPR), Sorkar Meghalaya, kum u Kyntiew Burom (Chief Guest). La ïadonlang ruh da ar ngut ki Members of District Council (MDCs) na West Jaintia Hills — Shri Jamshaphrang Pohtam bad Shri Medling M. Swer — kum ki Kyntiew Burom (Guests of Honour), ryngkat ka jingdonlang jong Smt. Deibor Patrecia Lytan, In-Charge Sub-Divisional School Education Officer (SDSEO), Amlarem Sub-Division, bad Dr. D. Lyngdoh, Block Development Officer (BDO), Amlarem C&RD Block, kiba la ai ruh ïa ki kyntien kyrkhu kyrdoh ha kane ka jingïalang. La sakhi ruh da ka jingdonlang jong ki ophisar sorkar, ki nongïalam shnong, ki kmie ki kpa, ki nonghikai, ki samla pule bad ki rangbah shnong.
Ka jingrakhe ka la sdang ha ka por 10:00 baje mynstep da ka jingpule kyntien, ka jingïaseng shuwa, bad ka jingïapyllait jingmut da kaba pynsahjar shi minit ban kynmaw burom ïa ka nongpynlong skul (L) Smt. Aiom Pyngngad Pamthied, la bud pat da ka jingai burom ïa ki kynduh burom, ka jingpynmih paidbah ïa ka Diengthaw Jingkynmaw (Commemorative Silver Jubilee Stone Tablet) bad ka jingkhleiñ jingkynmaw (cake cutting).
Ha ka jingkren jong u Shri Lahkmen Rymbui, u la ai mynsiem ïa ka skul halor ka jingjop jong ka, da kaba ong ba ka Mang Hai Ryum Higher Secondary School ka la long ka dak jong ka jingshaniah, ka jingshitom bad ka jingsngewskhem ban ïakhun ïa ki jingeh ban poi sha ka jingjop. U la pynpaw ïa ka jingiaroh ïa ka ïing jong ka nongpynlong skul kaba long ka nuksa jong ka jingsngewrit bad ka jingieit ïa ka kam, bad u la ong ruh ba lada tang 10% jong ki 55,000 nonghikai ha ka jylla ki don ïa ka jingïohi bad ka jingangnud kum kane ka skul, ka pule puthi ha Meghalaya kan kylla sha ka thong kaba heh.
U Myntri u la pynbna ruh ïa ka thong jong ka Sorkar ban pynbeit ïa ka rukom ai tulop jong ki nonghikai ha ka jylla sha tang ar kyrdan — Grant-in-Aid bad Government Salary, bad la buh thong ban pyndep ïa kane ka kam hapoh u Nohprah 2025. U la pynpaw ka jingsngewkhia halor ka jingduna ki samla pule ha ki skul sorkar hapoh Amlarem Sub-Division bad u la kyntu ïa ki nongïalam shnong ba kin shim bynta ban kyntiew ïa ka pule puthi bad ban pynkhlaiñ ïa ki skul ha ki shnong ki thaw.
Ha kane ka sngi, u Myntri u la pynbna ïa shibun ki jingïarap sha ka skul, kynthup ïa ka ₹15 lak lyngba ka Chief Minister’s Special Development Fund (CMSDF), ₹10 lak na ka bynta ka jingpynkhlaiñ ïa ki jaka pule bad jingtei, bad ar tylli ki Maruti Eeco Van na ka bynta ka jingkit bad jingleit skul jong ki khynnah. U la pyntip ruh ba ki kot jingtrei (work orders) kin shah ai ha ka sngi ba u Myntri Rangbah Shri Conrad K. Sangma un wan jngoh ïa Amlarem ha ka 12 tarik u Nai Naiwieng 2025, ha ka jingrakhe 50 snem ka Amlarem Sub-Division.
Ha ka jingkren jong u Principal Shri Tyrmei Chynnam Pamthied, u la pynpaw ka jingsngewnguh sha U Blei halor ka jingkyrshan jong U ha kine ki 25 snem da kaba ong, “Da ka Jingisynei jong U Blei ngi ieng, bad na ka bynta ka Burom jong U ngi shine.” U la kynmaw ïa ki por ba nyngkong ha ka skul kaba dang don tang ha ka ïing tin bad kawei ka kamra kaba pynïalong ïa ki bun ki klas lang, haduh mynta ba la poi sha ka jingjop kaba kynthup ïa ka 100% pass percentage ha ka SSLC 2025.
U Principal u la ai burom kyrpang ïa ka (L) Smt. Aiom Pyngngad Pamthied, ka nongpynlong skul, da kaba pynpaw ïa ka kum ka nonghikai kaba trei haduh ka por miet ban pynbiang ïa ki kot eksam bad kaba ai jingïarap ïa ki khynnah rit khynnah bym don pisa. U la pynpaw ruh ïa ka jingïohi jong ka skul ban pynlong ïa Amlarem kum ka rynsan jong ka jingnang jingstad (Educational Hub) ha ka War Jaintia da kaba plie ïa ka Science Stream, ban tei ki laboratory, ban pynkhlaiñ ïa ka fencing ban ïada ïa ki khynnah, bad ban pynbha shuh shuh ïa ki jingdonkam ban kyntiew ïa ka jingim ki samla pule.
Ka jingïalang ka la kynthup ruh ïa ki jingkren na u Chairman Shri Lamdibok Sumer, Smt. Deibor Patrecia Lytan (I/C SDSEO, Amlarem Sub-Division), Dr. D. Lyngdoh (BDO, Amlarem C&RD Block), u Rangbah Shnong Amlarem, bad u DSEO, Jowai. La pynshongkun ïa ka sngi da ki jingshad tynrai Khasi, Jaintia, Garo bad Manipuri, kiba pyni ïa ka jingriew spah ka kolshor jong ka jylla Meghalaya. La ai ruh ïa ki khublei kyrpang sha ki nonghikai shipor ba slem, ki samla pule ba kham paw (Academic Achievers 2007–2025) bad ki nonghikai ba dang trei mynta.
Ka jingïalang ka la kut da ka jingsngewnguh bad ka jingsngewkmen jong ka kynhun skul baroh, kaba pyni ïa ka jinglong ka skul kum ka nongïalam ha ka jingnang jingstad bad ka jingai mynsiem ha ka War Jaintia Hills.
Ka skul Mang Hai Ryum Hr. Sec School, Amlarem ka la rakhe ïa ka Silver Jubilee
