Shillong: Ka Hima Lyngiong ka la pyllong ia ka tamasa bam ñiangphlang kaba saw mynta ka sngi, 20 tarik Risaw 2025 ha Umsawmat.
Kane ka tamasa la pyllong shi bynta ym tang ban bam ia u ñiangphlang hynrei ban pynsngewthuh ia ki paidbah shaphang ka jingdonkam ban pynneh bad iada ia ka mariang, ym ban pynjot pynpra ia ka khamtam da kaba jrong kti ban thang ia ki khlaw ki btap khnang ba ki ñiangphlang kin ym duh jait.
Ka Hima Lyngiong ka don ki jingbuh jingsat ba bun bah ka mariang naduh ki lum ki wah, ki krem, ki syntiew ki skud bad kiwei kiwei kiban khring ia ki nongwankai.
U myntri ka tnad sorkar jylla u bah Sanbor Shullai uba la wan ban sakhi ha kane ka tamasa, ula kular ban ai ka jingkyrshan na ka sorkar ia ka Hima halor kane ka bynta bad ula ong ba un sa shong jingialang kumno ban pynbha ban pynjanai bad kiwei ki jingdonkam.
Ha kajuh ka por, ula song ñiangphlang ruh ban rah sha ïing ban ai ia ka kurim bad kiba haïing hasem.
U MLA ka Mawphlang u bah Beyond Kurbah ula kyntu ia ki paidbah ban ri ban sumar ia ka mariang bad na ka liang jongu, un iai kyrshan ia kane ka tamasa. Ula kyrpad ia ki paidbah ban ym thang pathar ia ki khlaw ki lum namar ba kan ktah ia ki jingthaw ba im, bad ia u ñiangphlang wat ban duh jait syndon.
Katba u Lyngdoh ka Hima Lyngiong u Bah Hamphrey Ryntathiang ula ong ba u ñiangphlang u mih tang ha ka shi aiom ha ka shi snem, bad ka donkam ban pynneh ban pynsah bad lada ym burom ban pynneh ia ka mei mariang, yn sa ioh ia ka jingpang.
Hadien ba la wai ka jingkren, u bah Sanbor, u bah Beyond bad kiwei kila leit jngoh ia ki dukan die ñiangphlang bad kila bam ñiangphlang artad ba la shet bang bha da ki briew ha katei ka tamasa.
La pyllong ruh ia ka jingiakop pyni khunlung, ka riam tynrai bad kiwei ha kane ka sngi.
Wat ia jrong kti ban thang ia ki khlaw, ioh duh jait noh u ñiangphlang
