Shillong: Ka Hynñiewtrep National Youth Front (HNYF) Southern Border Area ha ka sngi Nyngkong ka 20 tarik Risaw 2025 ka la rai ba kan khang ïaid kali khlem pud naduh ka por 8 baje mynmiet ka 20 tarik Risaw 2025 ha ka surok Balat-Dangar-Sonatola-Umpung.
Ia kane ka rai lashim ha ka jingialang kaba long mynta ka sngi ha kaba la iashim bynta lang ki nongñiah kali kamai kiba kamai na Balat-Dangar-Sonatola-Umpung bad kumjuh ruh ïa ki trai kali ban ïakren ha kaba ïadei bad ka jinglong jingman jong ka surok kaba la sniew shaba palat.
Ïa kane ka jinglum lang la pynlong ha IB kaba don ha Dangar ia kaba la wan ban ïashim bynta da ki driver ha kaba ki la ïoh ban ïashim bynta ban pynpaw ïa la ki jong ki jingeh ha ka jingïaid kamai jong ki kaba man ka sngi.
Na ka liang ka HNYF ka la shim ruh ïa ka rai ba kan pynlong da ka jingïakhih kaba khlem buh por ban khang ïaid kali naduh ka por 8 baje mynmiet jong ka 20 tarik Risaw 2025 b ïa kaba la ai jingkyrshan ruh da ki nongñiah kali kamai, kum shi bynta ban pynbor ïa ka sorkar ba kan shna pynbha noh ïa ka surok.
U Bah Kyllang S Thongni uba dei u President ka HNYF Southern Border Area haba kren sha ki nongthoh khubor hadien ba la wai ka jingïalang, u la ong ba ka seng ka la shim ïa kane ka rai kadei namar ba ka sorkar ka la leh kuman halor ki mat jingdawa ba ka bynta ban shna pynbha ïa ka surok.
U la ong ba ka sorkar ka la leh beiñ shaba palat ïa ka surok naduh Mawsynram, Phlangwanbroi shaduh Balat, Umpung bad Photkroh kaba la buh jingeh ïa ka leit ka wan. Na ka liang ki nongñiah kali kamai, ki la pynpaw ka jingeh na ka jingsniew palat jong ka surok, ha ka jaka ba kin ïaid tang khyndiat kynta bad tang da ki minit, hynrei ki la hap ban ïaid da kiba bun kynta. Uwei na ki driver u la ïathuh ba ka jingsniew bad nalor ba ka surok ka rit, ki shem jingeh ruh ban ai pass khamtam haba ïakynduh ïa ki trok kit coke., kumta u la ong ba na ka liang jong ki, kin ai ka jingkyrshan kaba pura ïa ka jingiakhih ka seng HNYF.
Ka seng HNYF kan sa pynlong ruh ka jingïalang ha ka shnong Jyllep ha ka por janmiet ban pynshai sha ki paidbah halor kane na sienjam ba ka la shim.
Kumba la sakhi ka surok na Mawsynram-Balat shaduh Umpung-Photkroh ka sorkar ka la lehbeiñ shabar palat khlem kano kano ka jingshna thymmai hynrei la shu syrdep malu mala ha kaba la sakhi ba ka surok mynta ka la julor bad pei thliew.
Khang iaid kali ka HNYF ba pei thliew lut ki surok na Balat-Dangar-Sonatola-Umpung
