Shillong: U Superintendent of Police ka North Garo Hills Resubelpara (NGH), ula pyntip ba ha ka 12 tarik Risaw, 2025, ar ngut ki runar kiba donkti ha ki kam tuh kam thiem kila shah kem ha ki pulit hadien ba ka bike kaba ki shong ka la aksiden hajan Berubari kaba hap ha Bajengdoba PS katei ka district.
Mar ia ioh jingtip na ki briew halor kane, ki pulit kila mreh bran bran sha katei ka jaka.
Hadien ba la poi ha katei ka jaka, la shem ba ka bike ka la aksiden da kaba leit tynrah ia u dieng harud ka surok ha NH 51 bad baroh ar ngut kila thiah lyngktar ha surok bad la pynkit ia ki sha Bajengdoba PHC ban ai jingsumar, shwa ba ki paidbah kin ioh ban noin ia ki namar ba kila khie bitar hadien ba kila lap ia ki tiar kum ka wait na pla jongki. Ki pulit kila rah noh ruh ia ka bike (ML 07 B 7072 Bajaj Platina) kaba ki pyndonkam.
Hadien ba la leh ia ka medical examination, la lap ba ki dih kyiad kaba ialam sha ka jingjia aksiden.
Kine ki dei ba la tip kyrteng kum u Walchang K Sangma bas ah ha Salmanpara, South West Garo Hills District bad u Mikselbirth Sangmaba sah ha Gabil Bisa, kaba hap ha PS Rongjeng, East Garo Hills District.
Na ka pla jongki, la lap ar tylli ka suloi shna hi, san tylli ki mobile phones, kawei ka khukri, kawei ka Odomos, shi sla ka Diclowin plus tablet bad ki jain.
Ha ka jingtohkit ki pulit, la shem ba u Walchang u dei uba la don kam runar pyrshah ia ka kynthei ha Ampati PS bad u don ha ka judicial custody kaba 7 snem katba u Mikselbirth u la shah kem halor ka jingrahbor ia ki briew ha Ampati PS.
Baroh ki iakynduh ha phatok ha District Jail ha Tura, West Garo Hills ha kaba kila plan ban leh shuh ia ki kam runar mar ia lait na phatok.
Ha ka jingtohkit kila phla ba kila tuh 3 tylli ki mobile phone na ki briew ba shong bus bad ia ka bike kaba ki pyndonkam la tuh na Rongmil, East Garo Hills district dang ar miet, kata ha 10 tarik, Risaw. Ki thmu ban leit die ia kine ki mobile phone ba la tuh sha Assam hynrei ynda la poi ha Berubari kila kynduh noh ia ka jingjia aksiden.
U Walchang u phla ba u shna hi ia ka suloi tynsah ha jaka sah ka mei ieid jongu ha RC Road, Tura. Ula rah ia kane ban pyntieng ia ki briew haba ki leh ia ki kam runar. Ki pulit kila pyllong ia ka jingtohkit shuh shuh halor kane bad leit tian bishar sha ka Kashari kine baroh ar ngut.
Katba dang thmu leit die ia ki mobile ba tuh, aksiden pynban, mynsaw 2 ngut ki runar
