Shillong: U symbud myntri rangbah ka jylla u Bah Sniawbhalang Dhar ula kyntait mardor ia ka jingkynnoh ki briew ba ha kane ka sorkar, la synshar da ka longïing Dhar namar ba ki don bun ngut ki MLA ba long myntri sorkar kiba don jingiadei bad ka longïing Dhar.
Haba kren sha ki lad pathai khubor, u bah Sniawbhalang ula ong ba u don ha ka shuki myntri, ym dei na ka bynta ka longïing jongu hynrei na ka bynta ki paidbah ka jylla bad u la ong ba mynshwa ruh u Conrad K Sangma bad u James Sangma ki long myntri rangbah bad kumjuh u Dr. Mukul Sangma bad u Zenith M Sangma ruh kila long myntri sorkar lang mynshwa, te balei pat, kaei ka jingeh ba ki kwah dait ia u.
Ka la don ka jingkynnoh ba ha kane ka sorkar, la ioh kabu tam ka longïing Dhar, namar ba u MLA ka Jowai bah Wailadmiki Shylla uba dei u kynum u bah Sniawbhalang u long myntri sorkar, bad kumjuh u MLA ka Jirang u bah Sosthenes Sohtun uba dei u niangkohnguh jong ka Dhar, u long myntri.
Ngan don ha shuki ym ia ka ïing, u Conrad & James, u Mukul & Zenith ruh ki long myntri lang, balei dait ia ngi: Sniawbhalang
