Shillong: U Symbud myntri rangbah u bah Sniawbhalang Dhar ula ong ba ia mynta ka jinglong jingman ha thain lapangap, ka long jai jai bad kan sa bit sa biang kumba ju long ha kine ki khyndiat ban wan.
Hynrei ha kajuh ka por, ula ong ba um pat leit jngoh sha katei ka thain ia mynta bad ki pulit kila don ban ai ka jingshngain ia ki paidbah.
Haba kren mynta ka sngi, u bah Sniawbhalang ula ong ba ka jingiakren bad ka sorkar Assam kan bteng na ka bynta ban pynbeit ia u pud u sam. U la ong ba ka jaka kaba mih ka huri hura ha Lapangap kam ju jia mynshwa namar ba ki Khasi ki leit rep ha katei ka jaka kaba hap sha Meghalaya hynrei don katto katne ki jaka kiba lah ban dei ka Assam ha kaba ka Regional Committee kan sa bishar halor kane.
Katkum ka jingong u bah Sniawbhalang, ki don ki jaka rep ba ki briew na Meghalaya ki rep sha jaka ba hap sha Assam bad don kiba na Assam kiba rep sha Meghalaya ruh.
Lah ban kdew ba hynnin ka sngi, uwei u briew na Assam ula khlad ha ka jingiakynad ha katei ka thain Lapangap.
Ngam pat leit jngoh ia mynta, la don ki pulit ha Lapangap: Sniawbhalang
