Shillong: Jan baroh ki iabeh ia ka kam sorkar lada dei tang ka kam pynkhuid painkhana ruh hynrei uwei u samla u ieh ia ka kam sorkar kaba la ioh ruh, namar u kwah ban seng kam lajong.
Kane ka khubor kan ai mynsiem ia ki samla ka jylla ba kim dei ban peit jawdud tang ia ka kam sorkar hynrei ki dei ban sain ialade ban long u nongseng kam.
U bah Jubanlang Kharbihkhiew ula ieh ia ka kam sorkar kaba u trei ha ka tnad Community and Rural Department ka jylla bad bun ki briew ki la kylli ia u, balei u ieh, um babe ban ieh kat ia ka kam sorkar, hynrei ka jubab na u, ka long em, namar ka mynsiem jong u ka long ba u thrang ban long u nongsengkam u nongaikam ia kiwei.
U bah Jubanlang ula seng syndon ia ka Online Tent Service Centre, kaba dei ka shlem ban ai jinghikai ia ki samla ha ki jait kam bapher bapher ba kin nang ban ieng ha la kijong ki kjat. U la seng ha u 2018, bad ka la pynmih shibun ia ki samla kiba la pyntbit ha ki jait kam bapher bapher.
Mynta ka sngi, kumba 40 ngut ki samla kynthei bad shynrang kiba la pyntbit ha ka computer, bad kiwei ki jait jinghikai, la sam syrnod mynta ka sngi.
Ha kane ka prokram sam syrnot, la don lang u bah Mariahom Kharkhrang kum u kongsan uba la pynkynmaw ba ka sap, ka jingtbit ka kham kongsan ban ia ka jingpule khlem ka jingtbit ne ka skill.
U Raja Dey, u Programme officer ka Jan Shikshan Sansthan, East Khasi Hills ula iathuh ba kane ka Jan Shikshan ka la lah ban ai jinghikai ia kumba 5 hajar ngut ki samla ha East Khasi Hills ha ki jait kam bapher bapher na ka bynta ki riewlum kane ka jylla.
Ieh u samla ia ka kam sorkar ban trei kam lajong, ‘bun kiba kylli phin babe, nga ong em’: Jubanlang
