Shillong: U kpa jong ka khynnah kaba shah pyniap ula iathuh ba hynnin ka sngi, katba u dang trei lyngkha, u khun shynrang ula wan khot ia u na lyngkha hadien ba ka khun jongu, ka khlem wan phai ïing.
Haba kren sha ki lad pathai khubor, ula ong ba katba u dang don ha lum, la wan khot ia u bad ynda la poi, ula kylli ia ka kurim kumno katno por kam pat wan sha ïing bad ka kmie ka la khot ka pyrta ruh hynrei khlem don ba jubab jar jar.
Kum ban shu kdew, ka heprit kaba dang 13 snem ka rta ka la shah pynïap dusmon ha ki riew thrang snam hynne ka sngi 09 tarik Risaw ha kawei ka shnong kaba hap hapoh ka jingpeit jingkhmih ka Mawlasnai Police Outpost, hadien ba ka khlem wan phai shuh na skul sha la ïing.
La iathuh ba ka kmie jong katei ka heprit ka dang mut ban leit shim kot na iing u Rangbah Shnong bad ha shiteng lynti ha ka por 10 baje mynstep ba dei kapor wai skul step ka lap iaka khun ba ka dang wan skul bad kumta ka phah ia la ka khun ban leit shim ia kata ka kot na ka iing u Rangbah Shnong bad ka kmie ka leit donkam noh shawei.
Ha kapor 1 baje eiei hadien ba ka kmie ka la poi iing ka la khot ia la ka khun bad kam shym la don ha iing bad ka kmie ka nang tharai ba ka leit kai, bad dei haduh kapor 4 baje janmiet eiei ba itei i heprit im shym la wan iing ka kmie ka la sdang ban wat bad ban pyntip sha ka Shnong bad naka liang ka Shnong ki la sdang ban wat ia itei i heprit bad dei ha kapor 7 baje eiei ki la lap pynban ia ka met jong i heprit ha kawei ka jaka kaba long khlaw.
U kpa u don sha lum katba ka khun ka jah bad lap pynban ia ka met iap
