Shillong: Ka Dorbar Shnong Umpung ka sngewkhia khamtam eh ïa ka Wah Umngi kaba tuid syndah ka Shnong kaba ai jingim, na ka jingkylla sniew dur bad sah khynrong ka wah na ka jingkhlong pathar ki briew.
U dkhot ka shnong, u Bah Commanding Kharmawleiñ u la ïathuh ba ha ki por ba kham mynshuwa u shyiap u dang bun ha katei ka wah ha kaba ki khynnah ruh ki dang ïoh ban ïalehkai sngewtynnad, hynrei mynta ka la sdang ban sniewdur noh.
U la ïathuh ba ka seng samla jong ka shnong ruh ka la buh ki kyndon ban pyrkhing khamtam eh ïa ki nongwan khwai kiba ju tuid sha katei ka wah ba kim dei ban leh kulmar ban pynsniew dur, ba kidei ban lum shi jaka ïa ki bilor, ki plastic haba ki la dep khwai, hynrei bun na ki nongwan khwai kim shym la bud ryntih ïa ki kyndon.
Ka dorbar Shnong haduh mynta kam pat shim bai khwai, hynrei ka buh tang ka donation khnang ban ai sha ki nongpynkhuid ïa ka rud nong jong ka wah kiba tam ïa ki plastic, ki bilor bad ki jaboh jabaiñ.
U ong ba ka EC kaba thymmai ka ïakhun ban pynlong ïa mariang bad ïa kane ka wah kaba khuid ba suba ha kaba kan sa thaw ki lad ki lynti ban buh pura noh da ki jingpynkhuid ban lum ïa ki jaboh, jabaiñ, khamtam ki plastic bad ki bilor ba ki nongwan khwai ki ju ieh bad bret pathar ha ki rud nong jong ka wah.
La iathuh ba ka jingbun ki dohkha, ka la khring ia ki rawon naduh Jaintia Hills, na Shillong ban hiar khnang sha katei ka wah khamtam ha ka sngi Thohdieng bad sngi Saitjaiñ bad don ruh kiba sahmiet lypa.
Ka shnong naduh ba ka la sumar bad pynneh pynsah ïa ki dohum, dohwah kam shah shuh ban pynap jar, ban kawang bom, ai dawai, hynrei la shah beit tang ban khwai bad lada lai ia kiba ialeh pyrshah, ka shnong kan aiti sha ki bor ka ain.
Ka shnong Umpung, kaba hap ha South West Khasi Hills District, Ranikor Constituency bad ka jngai kumba 96 km eiei na Shillong bad 29 km eiei na Umpung sha Ranikor bad ka dei ruh ka shnong kaba pynïakhlad na East Khasi Hills District lyngba ka Wah Umngi.
Naduh Jaintia, Shillong tan ki dohkha ha Umpung | Sniew dur & sah khynrong ka wah ba khlong ki briew ia ki maw
