Shillong: Ka elekshon ban jied ia ki MLA thymmai jong ka jylla Bihar kan long ha ki ar kylla, kawei ha ka 6 tarik bad kawei ha ka 11 tarik Naiwieng 2025 ban wan.
Ka jingpynbna ia ka rai u paidbah ne niew ia ki vote kan long ha ka 14 tarik Naiwieng. Ia kane la pynbna da u Chief Election Commissioner ka ri u Gyanesh Kumar mynta ka sngi.
Ka samoi jinglong MLA jong ka ïing dorbar thawain ka Bihar kaba don 243 ngut ki MLA kan kut ha ka 22 tarik Naiwieng.
Na ki 243 ngut ki Assembly constituencies, 2 tylli la buh kyrpang ne ai bhah ia ki Schedule Tribe katba 38 tylli la mang ia ki Schedule Caste.
Ia ka kynhun National Democratic Alliance (NDA), kaba synshar mynta, la ialam u myntri rangbah u Nitish Kumar na ka seng Janata Dal (United) bad la kyrshan da ka Bharatiya Janata Party (BJP) bad kiwei ki seng rit kum ka Hindustani Awam Morcha (HAM), Vikassheel Insaan Party (VIP) bad ka Lok Janshakti Party.
Katba ka liangpyrshah hapoh ka shatri ka Mahagathbandhan bloc, ka kynthup ia ka Rashtriya Janata Dal (RJD) ba ialam u Tejashwi Yadav, ka Congress, bad ki Left parties.
Ka seng thymmai ka Jan Suraj kaba ialam da u Prashan Kishore ka la paw bha bad ka lah ban jop bun ki MLA ha kane ka elekshon ha Bihar. Katkum ki stad peit pyrman sain pyrthei, kane ka seng thymmai ka lah ban pynjot ia ka kynhun NDA bad kumjuh ia ka Mahagahbandhan hynrei ka rai kaba khadduh kan sa mih ha ka 14 tarik Naiwieng.
Ar kylla yn thep vote ha Bihar 6 & 11 tarik Naiwieng, lah ban pynjot ka seng thymmai ia ka NDA ne ka India Bloc
