Shillong: U Symbud myntri rangbah bah Prestone Tynsong uba peit ia ka tnad District Council Affairs (DCA) ula ong ba ka sorkar jylla ka la thaw ia ka Committee ban pynbeit thymmai bad ban pynkhlain ia ki District Council ha kaba iadei bad ka kam pisa tyngka bad kam don eiei ka jingmut barieh sop sop sha lyndet.
Haba jubab ia ka mat kaba la wanrah da u MLA ka Nongkrem bah Ardent M Basaiawmoit hapoh ka iing dorbar, u bah Prestone ula ong ba ka sorkar ka la thaw ia ka Committee na ka bynta ba kan pule bniah ia ka mat kaba kynthup ban iasyllok bad ki Dsitrict Council ban pan ia ki jingmut jongki la ki pdiang ne em ia a jingtyrwa ka sorkar, ban wanrah ia ka jingshngain ha ka rukom pyniaid pisa, ban thungkam thungjam bad ban iakren bad ki District Council ban thung noh da ki ophisar IAS ne MCS ha ki baroh 3 tylli ki District Council.
U bah Prestone u la kam ba dei tang kane ka sorkar kaba shlur ban shim ia kane ka sienjam kaba khraw haduh katta katta ha kaba kiwei ki sorkar kim nud ban leh ia kane.
Kane ka Committee kan aiti ia ka kaiphod hapoh 45 sngi sha ka sorkar hadien ba ka la iasyllok ia ki District Council, ki kynhun bapher bapher.
U pyntip ba katkum ka jingkhein kaba la ioh ka sorkar, ka jingmih jong ka JHADC ha ka shi snem ka long kumba T.68.98 klur kynthup na ki marpoh khynew bad kali katba ka jingduna ka long T. 102 klur tang ban siew tulop, ha GHADC ka mih ka long T. 14.5 klur katba ka jingsiew tulop ka long T. 84 klur, ha KHADC ka mih T.46.11 klur katba ka jingpyllut ban siew tulop ka long T.72 klur.
Halor kane, ka sorkar jylla kala sngew dei ban shim noh da ka sienjam kaba kham khraw ban pynbeit thymmai ia ki jingeh jong ki District Council.
Halor ka 125th Amendment ka riti synshar ka ri, u bah Prestone ula ong ba ka sorkar jylla ka dang buddien bad ka sorkar India.
Ki district council ki kamai khyndiat, ka jingpyllut kaba jur
