Shillong: Ka High Court ka Meghalaya ka la pan jubab na u Advocate General hadien ba kawei ka seng ka la ujor mukotduma halor ka jingkhang ban ioh syrnod Scheduled Tribe sha kito ki briew kiba pyndonkam da ka jait u kpa lane kiba ai jait u tnga.
Ka seng Syngkhong Rymphei Thymmai (SRT) ka la iakhun ba ka jaitbynriew Khasi ka dei ban shim jait noh na u kpa, ym shuh na ka kmie.
Ka KHADC ka la wanrah ia ka Khasi Hills Autonomous District (Khasi Social Custom of Lineage) Act, 1997, ban iada ia ka jingshim jait na ka kmie katkum ka riti dustur u Khasi.
Ka Meghalaya High Court, ka la shong bishar ia ka Public Litigation Interest (PIL) ba la ujor da ka seng Syngkhong Rymphei Thymmai, kaba la pyrshah ia ka jingkhang lad ban pynduh ia ka Schedule Tribe certificate ia kito kiba shim jait na u kpa bad kito kiba shim jait na u tnga.
Kane ka jingujor ka SRT ka dei hadien ba ka ka jingpynbna kaba 21 tarik Naitung, 2020 kaba la pynmih da ka tnad Social Welfare Department kaba la bthah sha baroh ki Deputy Commissioner. Ka jingpynbna ka la ong ba ka Act kam shym la khang ia ki riew shimet kiba shim jait na ki kmie kpa bad ka shah ia ki tnga kynthei ki bym dei Khasi ban shim jait na u tnga.
Hynrei ia kane ka jingpynbna, la pyndam noh da ka tnad Social Welfare ha ka 21 tarik Jymmang, 2024, kaba la pyllong ia ki bor sorkar ban kyntait ban ai Schdedule Tribe ia kito ki Khasi kiba pyndonkam ne shim ia ka jait na u kpa ne kito kiba shim jait na u tnga.
Ka SRT ka la iasaid nia ba katkum u briew u dang dei na kajuh ka snam bad ka jinghiar pateng katkum kane ka ain, kaba la pynkylla ha u 2023, ym dei ban khang lad ban ioh ia ka Schedule Tribe.
Ha ka hukum, ka kynhun nongbishar kynthup ia u Chief Justice Indra Prasanna Mukerji bad u Justice Wanlura Diengdoh kila ong ba kim sngew dei haduh kane ka khyllipmat ym pat donkam ban pan da ka affidavit bad lada donkam hadien, kan sa khot ia ki hynrei na ka bynta ka jingbit jingbiang jong ki Khasi, ka donkam ban pynbeit ia kane ka mat kloi katba lah.
Ka kashari ka pan jubab na u Advocate General bad kan shong bishar biang ha ka 7 tarik Nailar ban wan.
Pan jubab ka High Court na u AG halor ka mukotduma ban ai jait sha u kpa
