Shillong: Ban tehlakam ia ka jingtan sikret bad ban iada ia ka jingkoit jingkhiah ki briew, ki pulit ka East Khasi Hills kila pyllong ia ka jingkhynra ia ki nongtan sikret bad ki biri katkum ka Cigarettes and Other Tobacco Products Act (COTPA), 2003 kiba kynsit bad tan sikret ha ki jaka paidbah kiba la mana da ka ain.
Ha kane ka jingkhynra ia ki nongtan sikret bad ki nongdie ha ki jaka pule, ki jaka hospital bad kiwei ki jaka paidbah, ki pulit kila ioh dain kuna jan shi lak tyngka.
Ka jingkhynra ka long shi bynta jong ka National Tobacco Control Programme (NTCP) hapoh ka National Health Mission (NHM) ha baroh ki jaka ka district. Ka Cantonment Beat House bad Lumdiengjri Police Station kila ioh dain kuna bun tam ki nongtan sikret bad ki nongdie.
Kane ka jingkhynra kam dei tang ka kuna hynrei ka long ban hikai ia ki briew ban kiar na une u jingdih ba sniew bad ban iada ia ki khynnah, ki tymmen bad ki bym dih sikret na ka jingma ka tdem ba pynmih na u sikret. Ka thong ka long ban pyllong ia ka Meghalaya kaba lait na ki nongtan sikret
Kane ka sienjam ba la shim ki pulit, ka la wanrah ka jingai khublei na ki briew. U samla pule ka St. Anthony’s College ula ong ba ki khynnah bad kiba la tymmen ki shitom na ka jingher ka tdem na ki sikret bad ula iaroh ia ki pulit ka Meghalaya halor kane ka sienjam ba kila leh.
U State Nodal Officer ka NTCP u Dr. Nabneeta D. Mawrie ula ban jur ia ka jingma na ka jingtan sikret, ha kaba kumba 40 percent ki briew ki ioh jingpang bampong na ka tdem sikret bad 90 percent ki ioh jingpang bampong na ki shyntur, ki tangkro na ka jingpyndonkam ia u sikret bad ki duma.
Ha kane ka jingdain kuna, ki pulit ka East Khasi Hills kila ioh lum ₹99,280.
Jan shi lak tyngka na ki nongtan sikret, ioh daiñ kuna ki pulit East Khasi Hills
