Shillong: Hadien ba ïoh ïa ka hukum na ka ïingkashari High Court jong ka Meghalaya ban pyntreikam ïa ka Plastic Waste Management Rule, ki bor pynïaid district ka East Khasi Hills, ki la bthah ïa ka Shillong Municipal Board (SMB) ban khynra ïa ki plastic ba la khang ban pyndonkam bad ha ka 15 tarik Naitung kaba dei ka Sngi Ba-ar, la sdang ïa kane ka jingkhynra ha artylli ki jaka ïew, kawei ha Laban bad kawei ha ïew Polo.
Ha kane ka jingkhynra ki nongtrei ka SMB ba kynthup ïa ki environmental engineer ki la kurup bun ki plastic ba ka mana ban pyndonkam kiba dei hapoh 120 micron, bad ki bym don ïa ka shap jong ka kompani pynmih plastic, ba kynthup ïa ki klat plastic, ki shamoit plastic, ki pla plastic bad kiwei ki tiar plastic kiba dei ki single use plastic ba la mana.
Ha kane ka Sngi ba khynra, ki bor ka Shillong Municipal Board ym tang ba ki la kurup noh ïa ki plastic bym long ban pyndonkam, hynrei ki la ai jinghikai ruh ïa ki nongdie jingdie ba ki dei ban tip ïa ki plastic ba lah ban pyndonkam da kaba scan ïa ki QR Code ha ka por ba ki thied ïa ki plastic ba lah ban pyndonkam katkum ka jingbthah ka Central Pollution Control Board (CPCB).