Shillong: Ka jinglong khyllew bad leh sarong kiba niah ar shaka ban leh stunt ha ka surokbah ha thain Bhoi ka Guwahati-Shillong, kam shym la pynshynrain satia ia ki pulit kiba la ai jingsneng bad hikai bunsien.
Mynta ka sngi ka 13 tarik Naitung 2025, ki pulit ka Ri-Bhoi kila mih sha surok ban bat ia kine ki nongniah ar shaka kiba wan niah khyllew ne stunt ha katei ka surok bad kila dain kuna ruh ia ki bad kurup ia ki ar shaka kiba la pynkhein ia ka ain.
Man ka por, ki nongniah ar-shaka, ki la pynlong ia katei ka surok kum ka jaka iakop pynher stet, kaba la buh ia ka jingma ia kiwei ki kali bad ki nongiaid nongieng.
Kaba kham pang met, ka long ba ka la mih ka jingjia aksiden na kane ka jingleh jong kitei ki briew ban niah khyllew ha surokbah.
Ki Pulit Ri Bhoi man ka por kila pynsngewthuh bad ai jingsneng da ka ktien hynrei haba kim sngap, kim banse ban ai da kaba kham tyngeh ban dain kuna syndon.
Ha ka jingpynap shrip ki pulit mynta ka sngi, kila ki la ioh ban bat shibun bah ki ar shaka kiba niah khlem akor bad leh khyllew bad don ruh kiba shah dain kuna bad don ruh ba ki shu ai jingsneng ba kim dei ban mlien shuh nangne shakhmat.
Hynrei hapdeng kane ka jingshim khia ki pulit, la don kawei ka jingjia aksiden ka ar shaka number ML-05-K-3280, ha kaba baroh arngut ki la mynsaw jur.
Daiñ kuna ki pulit ia kiba niah khyllew, lada aksiden hap her kum ka eroplein
