Shillong: Ha ka rai kaba lah ban pynjem mynsiem ia ki riew ngeit Hindu, ka High Court, Meghalaya ka la bthah ia ka yatra, ka kynhun niam Hindi ba ka lah ban leit synreit um ha u Mawjymbuin tang kum ka dak hynrei ym shah ban theh um ha u krem Mawjynbuin ha Mawsynram, East Khasi Hills.
Ka High Court ka la pynmih ia kane ka hukum ha ka jingshong bishar ha kane ka sngi Thohdieng bad ka la pynmih ia kane ka hukum hadien ba ka kynhun Yatra ka la kular ba kan ym leh puja da kaba wanrah ia ki tiar ban leh niam ha katei ka krem Mawjymbuin kum ki dieng sma iwbih, ki syntiew bad kiwei.
Ia kane ka hukum la pynmih da ka Single Bench jong u Justice HS Thangkhiew, ha kaba ula ong ba hadien ba la ioh ia ka jubab na kiba iakhun mamla lyngba ka Deputy Commissioner, bad ka jingkular ba la ai ka Dorbar Shnong, Mawsynram ia ka kynhun Yatra, la shah ban iaid pilkrim katkum ki kyndon.
Ka Kashari ka la bthah ban pynneh ia ka jingkhuid jingsuba, ban ym pynthut ia ka leit ka wan ki kali haba pyllong ia kane ka yatra.
U Justice Thangkhiew ula bthah ruh ba kiba pyllong kin buh ia ki nongpahara ne ki volunteer ban peit ia ka leit ka wan ki kali kan ym thut ha ka sngi ba ki iaid yatra.
Ia ka sngi ban iaid yatra yn rai da ki kynhun bad dei ban pyntip sha ka bor district.
Mynshem snem, ka dorbar shnong Mawsynram ka la kyntait ban ai jingbit ne no-objection certificate ia ka kynhun yatra ki Hindu ban mane blei ha krem Mawjymbuin bad halor kane, ka kynhun yatra ka la ujor sha ka High Court Meghalaya, kaba la pyllong ia ka Kashari ban pynmih ia kane ka hukum mynta ka kynti.
Ka Kashari ka la buh sngi ruh ban shong bishar biang ha ka 31 tarik Naitung 2025 na ka bynta ban pynmih shuh shuh ia ki hukum.
Shah ka high court meghalaya ia ka yatra ban shu synreit um, ym ban theh um ha krem mawjymbuin
