Shillong: Ka Myntri kam pla tyngka bad kam Kompeni jong ka sorkar pdeng ka Nirmala Sitharaman, mynta ka sngi ka la iashim bynta ha ka prokram ba kongsan ha LARITI, Shillong, ha kaba la buh mawnongrim na ka bynta katto katne ki projek kam pynroi kiba heh kiba thmu ban pynsted ia ki jingdon jingem, ka jingkyntiew ia ka ioh ka kot, bad bha ka miat ha ka imlang sahlang ha jylla Meghalaya. Ïa kane ka jingialang la plie da u Myntri Rangbah ka Jylla Meghalaya, u Conrad K. Sangma, ki Myntri ha ka Kynhun Myntri, ki heh ophisar na ka sorkar India, bad kiwei ki kynrem ki lyndan.
Ha kane ka prokram, ka Myntri kam pla tyngka ka Sitharaman ka la buh ïa u maw nongrim na ka bynta ban pynbha biang ïa ka pung Umiam hapoh ka ‘Special Assistance to States for Capital Investment’ (SASCI) ha ka jinglut kaba T. 99.99 klur bad ka jingkyntiew ïa ki jingdon jingem MICE (Meetings, Incentives, Conferences, bad Exhibitions) ha Mawkhanu, hapoh ka SASCI hi, ha ka jinglut kaba T. 99.27 klur. Ka la pynbna ruh ïa ka jingthmu ban tei ïa ka Mawkhanu Football Stadium hapoh ka SASCI ha ka jinglut kaba la antad T. 732 klur bad ka jingshna ïa ki Working Women’s Hostel ha Shillong, Jowai, Byrnihaat, bad Tura hapoh ka SASCI ha ka jinglut kaba T. 132 klur. Nalor kane, la plie paidbah ïa ka jingshna ïa ka Office cum Residential Complex na ka bynta ka Central Board of Indirect Taxes and Customs (CBIC) ha Umsawli, New Shillong, ha ka jinglut kaba T. 256.23 klur. Ka Myntri kam pla tyngka ka la buh mawnongrim ruh na ka bynta ka Indian Institute of Corporate Affairs (IICA), Northeast Regional Campus ha Mawkhanu, New Shillong Township hapoh ka Prime Minister’s DevINE Scheme, ha ka jinglut kaba T. 100.95 klur.
Kum shi bynta ka prokram ha kane ka sngi, ka la plie 75 tylli ki Digital Library ba la shna ha kylleng ki jaka ba jngai jong ka Jylla Meghalaya hapoh ka SASCI, ha ka jinglut kaba T. 162 klur. Ha kane ka jingïalang la sakhi ruh ïa ka jingsam ïa ki cheque sha ki nongïoh jingmyntoi hapoh ki skhim ai jingmyntoi ba kongsan, ba kynthup ïa ka PM MUDRA Yojana, PM SVANidhi, NPS Vatsalya, bad kiwei kiwei. Ha katei ka sngi ka la ïashim bynta ruh ha ka jingpynher lama na ka bynta ban shalan ïa ki sohtrun jong ka Meghalaya sha Dubai.
Haba ai jingkren ha kane ka sngi, ka Sitharaman ka la ong, “Nga iohi ka dei ka khubor kaba shai na u Myntri Rangbahduh halor ka jingthmu jong u. Ym tang lyngba ki jingwan jngoh bunsien jong u Myntri Rangbah hi dalade bad ki Myntri ha ka kynhun myntri ha kine ki shiphew snem ba la dep, hynrei lyngba ka jingaiti shimet na ka bynta ka jingkiew shaphrang bad ka roi ka par jong kane ka thain.”
Ka la bynrap, “Ki nongïoh jingmyntoi na ka skhim MUDRA bad kiwei kiwei ki sienjam ki ieng kum ki sakhi ba kine ki skhim ym tangba ki ai jingmyntoi tang ïa ki karkhana heh hynrei wat ïa ki kam rit kam ria ruh ki bym don pisa, jaka ne ki mar ki mata ban long kum ka jingshngain ban kyrshan ïa ki longïing jong ki. Naduh u snem 2014, u Myntri Rangbahduh Modi u la kren shai ba lada ki bank jong ngi kim lah ban bei tyngka ïa ki nongseng kam barit baria, ki nongdie dukan, bad ki nongdie jhur, kumno ngin kyrshan ïa ki nongshong shnong jong ngi? U la pynbna ba un long ka jingpynthikna ia ki kam barit baria ha kane ka ri, bad ba ki bank kin ym pan kano kano ka jingpynskhem na ki.”
Haba pynpaw ïa ka rukom treikam jong ka sorkar kaba kynthup lang ïa baroh, ka la ong, “Kine ki dei ki prokram kiba la pyrkhat bha lyngba ki prokram ban pynthikna ba ki nongseng kam barit baria kin ïoh ïa ka jingkyrshan khnang ba ym don mano mano ruh ha kane ka ri kiba sngew ba la shah iehnoh beiñ. Ngi ai ia kine ki cheque mynta ka sngi namar ngi ngeit ha ka jingpynkupbor ia ki briew, wat ha ki jaka kiba jngai. U Myntri Rangbah u ju ong ba u sngewthuh ia ka jingsngew jong ki paidbah. Ka nongrim kaba khraw jong ka Sabka Saath, ka Sabka Vikas ka dang iaid shakhmat, ryngkat bad ki jingmyntoi kiba poi sha ki riew paidbah.”
Ka la ban jur ruh ïa ka jingdonkam jong ka jingkyntiew ïa ki jaka treikam ha ka thaiñ shatei lammihngi, da kaba ong, “Nga kwah ban pynpaw ïa ki jaka treikam kiba la wanrah sha ka thaiñ shatei lammihngi. U maw nongrim na ka bynta ban pynthymmai biang ïa ka pung Umiam hapoh ka SASCI ka dei ka jingbei tyngka kaba kongsan na ka bynta ka jylla. Ka dei ka jingthmu jong u Myntri Rangbahduh ban ïarap ïa ki jylla ban tei ia ki jingdon jingem kiba pynmih pisa.”
Ka Myntri kam pla tyngka ka la pynpaw ka jingsngewnguh jong ka ia ka jingpyntreikam sted jong ka Meghalaya ia ka skhim SASCI. “Ka jingsngewnguh jong nga ïa ka Jylla Meghalaya kaba la pyndonkam pura ïa kine ki lad ki lynti. Kane ka skhim kaba la sdang naduh u snem 2021, ka dei ka jingbei tyngka ïa ki projek kum ka jingpynthymmai biang ïa ka pung Umiam, ki jingdong jingem jong ka MICE, ka Mawkhanu Football Stadium ba la tyrwa ban shna, ki Working Women’s Hostels ha Shillong, bad 75 tylli ki Digital Library,” ka la ong.
Ka la pynpaw ruh ïa ka jingdonkam jong ki jaka treikam ba thymmai: “Ia ka Office-cum-Residential Complex jong ka CBIC ha New Shillong la bei pisa da ka sorkar pdeng. Ka IICA Northeast Regional Campus hangne ka dei ka IICA campus kaba nyngkong eh shabar ka nongbah Delhi, ha kaba ka jingbei tyngka ka long T.100 klur. Ka jingphaikhmat kaba la ai sha ka thain shatei lammihngi kam dei kaba lyngkot samoi hynrei kaba jrong samoi.
U Myntri Rangbah ka Jylla u Conrad K. Sangma ruh u la ai jingkren ha kane ka jingialang bad u la ai khublei ia ka jingialam jong u Myntri Rangbahduh, da kaba ong, “Hapoh ka jingialam ba iohi jngai jong u Myntri Rangbahduh, ka jingkyrshan ba pura jong ki tnad sorkar pdeng, kynthup ia ka Tnad kam pla tyngka, la pynpoi sha baroh ki jylla jong ka thain shatei lammihngi, kynthup ia ka Meghalaya. Ki jingwan jngoh ba man ka por jong u Myntri Rangbahduh bad ki Myntri sorkar pdeng ym pat ju iohi ba ki long kiba shimkhia kumne mynno mynno ruh. Nga ai khublei ïa ka Sorkar India kaba la buh beit ïa ka thaiñ Shatei Lam Mihngi ha ka jaka ba kongsan jong ka kam jong ka na ka bynta ka roi ka par.”
Ha kane ka sngi la donlang ruh u Symbud Myntri Rangbah ka jylla u Bah Sniawbhalang Dhar; Chief Secretary Bah D P Wahlang, Myntri ka tnad ka koit ka khiah Kong Ampareen Lyngdoh; Myntri ka tnad kam ri dohkha, Bah Alexander L Hek; Myntri ka tnat Civil Defence and Home Guards, Bah Comingone Ymbon; Myntri ka tnad ialehkai Bah Shakliar Warjri; bad u Myntri ka tnad Soil and Water Conservation, u Marcuise N. Marak; Secretary jong ka Tnad kam Kompeni, ka Deepti Gaur Mukerjee; bad u Chairman ka CBIC u Sanjay Kumar Agarwal.
Buh maw nongrim ka Sitharaman ba shongdor palat T. 1500 klur ha Meghalaya
