Shillong: Ka myntri ka tnad pla tyngka ka sorkar India ka Nirmala Sitharaman kam hun tang ban shu wan jngoh ia ka Meghalaya ban kren da ka phareng, hynrei ka la pyndonkam ruh ia ka ktien Khasi, kiba kit jingmut.
Kine ki kyntien Khasi ba ka myntri ka kren ha ka jingialang ha Lariti Performing Centre, mawdiangdiang, ki long, ka tip briew tip blei, kamai ia ka hok, tip kur tip kha, ka mei ramew bad ki ryngkew ki basa.
Kine ki dei ki kyntien ksiar jong ka jaitbynriew Khasi, la ong ka Nirmala haba kren ha kane ka jingialang.
Ka la iaroh ia ki longshwa ki Khasi kiba don kum kane ka jingstad kiba kordor haduh katta katta bad kiba iai im junom.
Ha kane ka prokram, ka myntri ka la plie ia u maw nongrim ban tei ia ka madan kynjatbol kaba heh tam ha ka ri ha Mawkhanu kaba T.732 klur. Ka la plie ruh ia ka 75 + Digital Libraries ba T.162 klur. Ban tei thymmai ka thain wah Umkhrah ha Polo ba T. 120.81 klur, Ka la plie maw nongrim ruh ban tei ia ka pung Umiam ba T. 99.99 klur, Working Women’s Hostel ha Shillong, Tura, Byrnihat bad ha Jowai ba T.132 klur, ka jingshna ia ka Meetings, Incentives, Conferences, and Exhibitions (MICE) ba T.99.99 klur ha Mawkhanu, Indian Institute of Corporate Affairs (IICA) Regional Campus ba T. 100.95 klur, bad ka Central Board of Indirect Taxes and Customs (CBIC) Integrated Complex ba T. 256.23 klur.
Kine ki projek ba ka buh maw nongrim kila kot baroh sha ka T.1,087.81 klur.
Ka Nirmala ka la pyntip ba naduh u 2021, ka jylla Meghalaya ka la ioh pdiang T.5400 klur na ka sorkar India na ka bynta ban tei ia ki jingdonkam u paidbah bad ka jylla.
‘Ka tip briew tip blei, kamai ia ka hok’ kren ka Nirmala ryngkat ki maw nongrim ba 1 hajar klur tam
