Shillong: Ka myntri ka tnad pla tyngka ka ri India ka Nirmala Sitharaman kan pyllut por lai sngi kynthih ha kane ka jylla Meghalaya naduh ka 10 haduh 13 tarik Naitung.
Ha kine ki lai sngi, ka myntri ka plie ia ka shopping complex ha Polo kaba la tei shi bynta jong ka Smart City Project bad hadien kane, kan iamir jingmut halor ka Project Monitoring Information System (PMIS) ha Shillong.
Ha ka 11 tarik pat, ka myntri kan plie ia ka Northeast Conclave bad kan buh maw nongrim ia ka Indian Institute of Corporate Affairs (IICA) ha Indian Institute of Management Shillong. Kan leit jngoh ruh ia ka Shillong Tech Park ha Umsawli bad kan plie ia ka iew pyni nam jong ki nongrep ha Lariti International Centre, Shillong.
Ha ka 12 tarik pat, ka Nirmala kan iakynduh ia ki nongseng kam ha Courtyard Marriott, Shillong. Hadien kane kan leit ban iamir jingmut ruh bad ki Self-Help Group jong ki kynthei, ki kynthei ba kamai lak ne ki Lakhpati Didis bad kumjuh ia ki Farmer Producer Organisations ha shnong Laitkynsew. Kan iakynduh ruh ia ki nongioh bynta na ka Payment for Ecosystem Services Program ha shnong Siej.
Ka myntri kan pynkut ia ka jingleit jngoh ia ka shnong Sohbar kaba dei kawei na ki 96 tylli kaba la jied kum ka Vibrant Village. Ha kane ka sngi, kan leit iuh kjat ruh ha ka Ram Krishna Ashram School kaba don ha Sohra.
Yn leit kynduh ka myntri ia ki nongrep ha Laitkynsew, Sohbar, Siej bad iuh kjat ha Ram Krishna ha Sohra
