Shillong: Mynta ka sngi ka Dorbar Shnong Wahrit Pyllun ka la pyllong ia ka jingiaid paidbah na ophis ka Horticulture sha Dom Mawlum, Pyndengumiong, Mairang ban pynrem jur ia ka jingshah pyniap dusmon ka samla Phyrnailin Kharsyntiew dang shen.
Haba kren ha kane ka jingialang, u President ka Kur Kharsyntiew Mairang u bah E Kharsyntiew ula kyntu ia kito ki briew kiba iohi ban pynskhem ia ka sakhi hakhmat ka ain ban ym kylla ktien kumba kila jubab bad iathuh ha ki lad pathai khubor lada ki pulit ki wan ban kylli bad lada don kiba shemtieng, kin sngewbha ban pyntip ia u.
Lah ban kdew ba ka samla Phyrnailin ka la shah ot na ryndang katba ka dang don bad u kpa jongka, ha Parking ha Pyndengumiong, Mairang ha ka 30 tarik Jylliew, 2025. Ka la khlad noh mar ia poi ha Hospital Mairang na ka jingmynsaw jur.
Ki pulit kila kem ia uwei u briew uba la tip kyrteng kum u Roberto Marngar, 25 snem halor kane ka jingjia.
Ia kane ka jingjia, la iohi bad sakhi ruh ki paidbah namar ba ka dei ha jaka kaba bun briew bad ka sngi iew Langstieh kaba la jia ha ka por mynshai por 5 baje eiei janmiet.
Kiwei pat kiba kren ha kane ka jingialang ki kynthup ia u MDC ka Pariong Mawthadraishan Constituency u bah Powell Sohkhlet, u bah Kotbor Warjri na ka Ophis u MLA Mawthadraishan, u Sordar ka shnong Pyndengumiong u bah Bornad Syiemiong kiwei ki Sordar shnong, ki nongkitkam shnong na ki shnong bapher bapher, ki nongialam seng bhalang, ki seng longkmie ryngkat ka jingwan ban sakhi lang ki paidbah, ki samla ki longkmie ki khynnah skul bad kiwei. Ia ka jingialang la pyniaid da u sordar ka Wahrit u bah Sbolin Mairang.
Pynsaja da kaba tyngeh ia u runar, sawa ka sur ka rally ha Mairang
