Shillong: Ka sorkar jylla ka la pynshna bha ia ka jaka na ka bynta ban pynshong ki nongdie madan na ka thain Khyndai Lad.
Ha ka jingleit jurip u nonglum khubor, la iohi ba ka jingtrei ban shna ia ki dukan shong die madan ka la iaid shaid shaid ha parking kaba ar mala jong ka MUDA ha Khyndai Lad.
Ka sorkar ka la buh thong ban pynkynriah ia baroh ki nongdie madan ha ki surok bad lynti briew na thain Khyndai Lad sha ki jaka ba ka la shna ha katei ka jaka ha MUDA bad kawei ha ka parking kaba don mar pyrshah ka SBI Main Branch.
Ki don kumba 400 ngut tam ki nongdie madan kiba ka sorkar ka la ai syrnod Certificate of Vending (CoV) kiba lah ban ioh jaka ban die madan ha ki jaka ba ka sorkar ka la buh.
Katkum ka jingong u myntri sorkar, bah Paul Lyngdoh, ka sorkar jylla ka la pynkhreh ban pynkhuid plain ia ki nongdie madan ban pynkynriah lut sha ki jaka ba la pynkhreh shwa ka 22 tarik Naitung.
U nongaiktien ka sorkar u bah Paul Lyngdoh ula ong ba ka rai ka High Court, Meghalaya ka la pynskhem ia ka sienjam ba la shim ka sorkar bad la khmih lynti shwa ka 22 tarik u Naitung, baroh ki nongdie madan kin bud ia ka jingbthah ka sorkar.