Shillong: Ka High Court, Meghalaya ka la bthah ba ki nongdie madan ki lah ban die katkum ka por, kata naduh 12:30 Pm haduh 2Pm bad sdang biang naduh 7Pm haduh 9Pm.
Ha ka hukum kaba la pynmih ha ka 3 tarik Naitung, 2025, u nongbishar Chief Justice IP Mukerji bad u Justice W Diengdoh kila bthah ba ki nongdie madan kiba la ioh license ki lah ban die ha kine ki por ba la buh bad ki dei ban mih noh mar syn kut ka por, ban lait na ka jingpynwit ia ka iaid ka ieng ki kali bad ki briew.
Ka la bthah ruh ba lada don kano kano ka jingpynkhein ia ka ain, u Special Officer ryngkat ki pulit kim dei ban shah ban die ia ki mar.
Kane ka hukum kaba la pynmih ka High Court ka dei hadien ba ka Meghalaya and Greater Shillong Progressive Hawkers and Street Vendors Association ka la ujor da kaba kynnoh ba ki nongdie madan kila shah kyndang beain na thain Khyndai Lad khlem pynbiang ia kiwei pat ki jaka ban die madan, hynrei na ka liang ka sorkar ka la pynphai nia ba watla ka la pynbiang ia ki jaka hynrei ki nongdie madan kila kyntait ban kynriah.
Khnang ban pynbeit ia kane ka kam, ka Kashari High Court, ka la thung ia u nongiasaid ain u Subhasis Chakrawarty, kum u Special Officer ha ka jingsiew kaba ₹ 75,000/- na ka sorkar.
Ka la bthah ba u Special Officer ryngkat ka jingiasyllok bad u General Secretary, Hawkers’ Association, bad ki pulit un pynkhreh ia ka thup kyrteng ki nongdie madan kiba la ai bor ne ioh license kiba don kumba 349 ngut. Ka la hukum ruh ba u Special Officer ryngkat u General Secretary ka Association, bad ki pulit kin peit ba kito ki bym don License kim lah ban die jingdie madan.
Ka Kashari ka la bthah ruh ba u General Secretary ka Association un bud ia ka rai ka Kashari bad ban pynthikna ba un mih na ka jaka sha kawei pat hadien ba la pynioh jaka ka sorkar bad lada um mih, yn shah kyndang.
Ka la ong ruh ba kiwei ki nongdie madan ki lah ban pan jingbit na ki bor ba dei peit ban ioh license kaba lah ban bishar pat katkum ka ain.
Hadien ba la ioh ia ka kaiphod na ki bor ba dei peit halor kane ka jingpan jingbit ki nongdie madan, ka kashari kan sa shim pat da kiwei ki sienjam.
Nalor kine, u Special Officer u dei ban pynthikna ba ka hukum jong ka Kashari kan treikam pura khlem kano kano ka jingpynkhein ia ka ain ne wanrah ia ka jingthut ha ka shongsuk shongsain.
Ka la ai por ia u Special Officer ban aiti ia ka kaiphod kaban pyndait lang bad ka kaiphod na kiwei ki bor sorkar sha ka Kashari ha ka sien shong bishar biang kaban long ha ka 5 tarik Nailar ban wan.
12:30 pm haduh 2pm, 7-9pm, bthah ka HC ban die madan, 5 tarik yn bishar biang
