Shillong: Ka sorkar Meghalaya ka la sam pisa T. 39 klur 17 lak, 64 hajar sha ki 26 tylli ki Sports Association ha ka jylla na ka bynta ba kin pynkhreh bha ban iashim bynta ha ka National Games kaba 39 sien, kaban long ha 2027 khnang ba kin ioh ban wanrah takma bun.
Ka Meghalaya kan pdiang ia ka lympung National Games kaban sa long ha utei u snem.
Ia kane ka jingialang sam pisa la pyllong ha State Convention Centre, Shillong.
Kane ka jingsam pisa ka sorkar ka kynthup ruh ia ka Meghalaya State Olympic Association (MSOA).
Kane ka pisa ka long na ka bynta ban pynbit pynbiang bad ban pyllut ia ki nongialehkai kiban iashim bynta ha kane ka lympung ialehkai ba heh tam ha ka ri.
Ha ka sien ba nyngkong ha ka ri, ba ka sorkar kan ai pisa beit sak ha ki Sports Association na ka bynta kane ka jingthmu, la ong u myntri rangbah ka jylla u Conrad K Sangma.
Kane ka pisa kan long ban siew ia ki coach, ban thied tiar, ban pyllong ia ki jingiakop ialehkai, ban wad ia ki nongialehkai kiba don sap, bad kiwei kiwei kiban kyntiew ia ki nongialehkai.
U Conrad u la ong ba ka jylla ka dei ban buh thong ban khur takma ym duna ia ka 50 tylli na kane ka lympung.
Ha kane ka sngi la don lang u myntri ka tnad ialehkai u bah Shakliar Warjri, u Working President ka MSOA u bah John F. Kharshiing bad kiwei.
La ai ruh sha ka samla Rifiness Warjri T.1 lak na ka bynta ka jingjop jongka ban kiew ia u lum Mangkashang ha ka rta kaba danng 20 snem. U Myntri Rangbah ula pynbna ruh ba un ai T. 5 lak na ka Chief Minister’s Special Grant.