Shillong: U symbud myntri rangbah ka jylla u bah Prestone Tynsong um treh ban kren eiei halor ka jingmih khubor ban don ka jingbujli myntri ha kane ka sorkar MDA-II.
Haba kren mynta ka sngi, u bah Prestone ula ong ba ka kam bujli ia ki myntri, ka shong beit ha ka mon laitluid jong u myntri rangbah ban leh ia kata, bad ma u, um lah ban ong eiei.
Katkum ka khubor, u myntri ka tnad pule puthi u Rakkam A Sangma bad u myntri ka tnad sam marbam u bah Comingone Ymbon na ka NPP, ki lah ban shah pynhap shuki noh bad ha jaka jongki, yn bujli da u Marthon Sangma bad u bah Wailadmiki Shylla.
Kumjuh u myntri ka tnad ri jingri u bah AL Hek ula shah ban shah pynhap ban mih bujli noh da u bah Sanbor Shullai kiba dei na BJP bad u myntri ka tnad ialehkai u bah Shakliar Warjri ulah ban shah pynhap ban mih bujli da u bah Methodius Dkhar kiba dei na ka HSPDP.
Kane ka jingthmu ban pynhap shuki ia kine ki myntri, ka lah ban long kum ka jingiateh hapdeng jongki, ban iasam mar ar snem shiteng ia ka shuki myntri.
Ha kawei ka liang, halor ka jingpaw ka kyrteng u James PK Sangma ban long u kyrtong MP sha Rajya Sabha, u bah Prestone ula ong ba ym pat iakren eiei ha ka party halor kane ka kam.
Lah ban kdew ba u Dr. WR Kharlukhi ula kren shai ba um kwah shuh ban iakhun biang ia ka elekshon MP sha Rajya Sabha hadien ba la kut ka samoi jongu ha u 2026.
Kbum u bah Prestone halor ka jingbujli myntri, ka shong ha Myntri Rangbah
