Shillong: Ka surok ka dei u budlum ka leit ka wan, ka kit ka bah jong ki briew khamtam ban pynsuk ia ka leit ka wan bad ban pynpoi ia ki mar rep mar riang sha iew sha hat bad shisien ba ym don surok bad lada sniew ka surok, ka pyni ba ka thain ka dang sahdien bad kynduh jingeh shibun.
Ka surok na shnong Mawsahew ban poi sha Mawlakhiat ka dei kawei kaba sniew tasam haduh katta katta ha kaba wat ki kali heh ruh ki shem jingeh ban iaid.
Ha ka jingshisha, kane ka jaka ka dei kaba ju iaid bha ki nongwankai namar ba na Mawlakhiat ki noh sha Nongriat ban leit peit ia ka jingkieng armala ne double decker.
Ka jingsniew ka surok kala thad madan ia ka jinglong jingsahdien jong ka thain ha ki nongwankai kiba wan nabar jylla bad kumjuh nabar ri.
Ha ka jinghiar u nonglum khubor sha katei ka jaka, la iohi ba ka surok khamtam katto katne spah metre shwa ban poi sha jaka ieng kali ha Mawlakhiat, ka long kaba sniew haduh katta katta ha kaba ki kali rit kin shem jingeh ban iaid bad don ruh kiba thmu ban leit sha Mawlakhiat, ki hap ban ieng noh tang ha shiteng lynti namar ka jingsniew palat ka surok.
Wat ki nongshong shnong ruh kila ud ia kane ka jingsniew palat ka surok bad kan long kaba sngew lehrain ba kaba tuid ki nongwankai, ka surok pat wat u kulai ruh u kyrngah ban iaid.
Kane ka shnong ka hap ha Shella konstitwensi hapoh ka Sohra Civil sub-division.
Ka surok na Mawsahew sha Mawlakhiat wat u kulai ruh u kyrngah ban iaid
