Shillong: Ka jingshah pyniap u Raja Raghuvanshi ka la dap shi bnai pura mynta ka sngi, ka 23 tarik Jylliew 2025.
U Raja Raghuvanshi bad ka Sonam Raghuvanshi kila jah rngai naduh ka 23 tarik Jymmang ha ka por ba ki wan kai sha kane ka jylla hadien ka jingiathoh jongki.
Kine shi kurim kila jah rngai hadien ba ki la wan phai na Nongriat na ka lynti ka Mawlakhiat.
Naduh katei ka sngi, kine ki shi kurim kila jah rngai haduh ba ka la pyllong ia kiba haiing hasem ban pyntip paidbah ba kin iarap ban pyntip lada ki iohi ne lap ia ki.
Hadien kane, ki pulit ryngkat ki shnong ki thaw khamtam ka thain Mawlakhiat ha kaba la iohi khadduh ia ki ha katei ka sngi, kila pyllong ka jingwad kylleng ki jaka ka thain Sohra bad la pyndonkam ruh da ki ksew, ki drone hynrei khlem lap satia.
Hynrei hadien 10 sngi kynthih ba la pyllong ia ka jingwad, dei tad ha 2 tarik Jylliew, ba ki pulit ryngkat ki SDRF kila lap ia ka met u Raja Raghuvanshi kaba la pyut ha shiteng ka arliangriat kaba don ha parking hajan Wei Sawdong.
Ki NDRF ruh kila wan poi ban iarap ban wad ia ka Sonam Raghuvanshi hadien ba ki pulit ka jylla ryngkat ki SDRF kila lap ia u Raja na katei ka jaka.
Kane ka jinglap ia ka met u Raja, ka la pynkhynniuh ir ia ka ri India ha kaba la mih ki khubor sniew ban pynthoh bria ia ka Meghalaya bad ka thain Sohra kum ka ktem ki runar. Kiba haiing u Raja ruh kila kren tohmet ban kdew kti ia ki briew kane ka jylla bad ka thain Sohra halor kane ka jingjia.
Hynrei kumba iuh tdong bsein, hadien 7 sngi ba la lap ia ka met u Raja, ki pulit ka Meghalaya lyngba ka Special Investigation Team (SIT), kila lah ban thwet bad ban kem ia ki briew kiba dontki ha kane ka kam, ha kaba ka lok u Raja, ka Sonam Raghuvanshi ka la paw kum kawei na kiba leh ia kane ka kam.
Ha ka 8 tarik Jylliew, ki pulit ka Meghalaya kila ioh kem ia 3 ngut kiba donkti bad ha ka 9 tarik kila kem sa ia ka Sonam na Indore, Madhya Pradesh.
Kane ka jinglah ki pulit ka Meghalaya ban thwet bad ban kem ia ki runar, ka la pynkyndit ia ki briew ka Indore bad ka ri India, ban tip ba dei pynban ki briew na katei ka jaka hi, kiba la leh ia kane kam riew sniew kaba shyrkhei. Kane ka pyllong ia ki lad pathai khubor ka ri bad kiba haiing u Raja bad ka Sonam ba kin panmab kylla na ki paidbah ka Meghalaya.
Haduh mynta, ka Sonam Raghuvanshi bad 3 ngut kiwei ba kynthup ia u Vishal Singh Chauhan, u Anand Kurmi bad u Akash Rajput ki la paw hakhmat eh ban donkti ban pyniap ia u Raja katba u Raj Singh Kuhswaha uba dei u samla ka Sonam, u dei u nongplan ryngkat bad ka Sonam ban pyniap ia u Raja.
Kine baroh kila don ha ka judicial custody jong ka kashari u District and Session Judge, Shillong.
Ki pulit kila kem ruh sa ar ngut kiwei pat kiba suba donkti ha kane ka kam, kynthup u James Soloi bad u nongap pahara ha ka iing wai ba sah ka Sonam ha Indore bad ka jingtohkit ia ki, ka dang iaid.
Shi bnai thik, dap ka jingshah pyniap u Raja ha thain Sohra
