Shillong: U Myntri Rangbah ka jylla u Conad K Sangma, u la pynbna ba un noh ia ka jingiarap pisa kaba long 30 lak tyngka sha ka Shillong Sports Association (SSA), kaba long kum shi bynta pyniaid ia baroh ki lympung ialehkai ki jong ka, kiba dei naka bynta kane ka samoi ialehkai u snem 2025.
U Conrad u la pynbna ia kane hadien ba u la leit ban kyntiew ia ka lama jong ka SSA, kaba long kum ka dak jingplie paidbah ia ka samoi ialehkai mynta ka snem, ha SSA Stadium First Ground, Polo, mynta ka sngi ka 14 tarik u Jylliew 2025.
Kane ka jingwan plie u Conad K Sangma, ka long ruh artad da ka jingsdang ia ka lympung ialehkai jong ka U-20 Fourth Division League.
Ha kane ka jingplie paidbah, la wan ban sakhi lang ruh da u Secretary ka Meghalaya State Olympic Association u bh Finely L. Pariat, u Working President ka SSA bah Robert Dkhar, ki dkhot ka Tournament Committee, ki dkhot ka Council bad ki player bad kapten jong ki 29 tylli ki team.
Ha ka jingkren lyngkot, na ka liang u Conrad u sngew ban yn paw ia ka jingkmen ba kampher wat hadien ba la dang kham slem ia kane ka samoi ialehkai pynban ka sngi kane ka a poi ban sdang noh ia ka.
U Conrad u ai khublei ruh ia baroh ki dkhot jong ka SSA, halor ka jinglah ka jong ki ban pyndep lut ia baroh ki lympung ialehki ba dei jong ka samoi kaba la dep, da kaba u la pynkynmaw ba kum ka jylla, ka Meghalaya ka don ia ka thong bad katta hi ka long ban ynlong ia ka jylla bad nongbah shillong kum ka ‘Capital Football’ jong ka ri.
Kumta ban lah ban kynjoh ia kane ka tyhong la don bun bun bah ki kam ba la pyniaid shakhmat ha ka jylla hi baroh kawei kum ha kaba shna ia kiba bn tylli ki madan ialehkai Artificial Turf, ki Natural Turf Football Stadium, ka CM Fooball Mission, ka stadium ialehkai phutbol kaba heh kba la thmu ban tei ia ka ha Mawkhanu, ka Football Academy, ne wat ki lympung ne ki football league kiba pynlong ha ka jylla.
U Conrad u pynkynmaw ba ka sorkar, ha ka samoi kaba dep, ka la wan shakhmat ba kan iarap ia ki lympung ialehkai ka SSA lyngba ka Chief Minister Special Grant, bad mynta hi ruh ka snem kumba la kyrpad biang ia u, u la wan shakhmat ban pynbna ba un dang iai bteng ban kyrshan ia ka SSA aba long 30 lak tyngka.
Ha shwa ba un pynkut ia la ka jong ka jingkren, na ka liang u Conrad ai ia ka kitbok kitrwiang ia baroh ki team bad ki klob kiban iakhun mynta ka snem ba kin lah ban paw bad ialehkai bha.
Sha ia ka jingkren na u Myntri Rangbah, la ioh ia ka kyntien pdiang sngewbha ia kaba la ai a u Secretary ka SSA u bah D.L Nongbri.
Ha kane ka sngi plie pyrda ia ka samoi ialehkai, ka SSA ka la pynkup burom ruh ia ka Batbitbha Bareh bad Lucky Merry Lyngdoh, kiba long ki arngut ki referee phutbol kiba la pass ia ka kyrdan National Referee , nalor katta ba la pynbna ruh ba ka samla Philarima Hynniewta dang shen ila pass ia ka eksam kum ka Match Commissioner.