Shillong: Ka jingpynneh ka High Court, Meghalaya ia ka jingweng kam ka KHADC ia ki 18 ngut ki nongtrei, ka la pyllong ruh ia u CEM barim ka Council u bah Pyniaid Sing Syiem ban ai ka jingkynthoh halor kane.
Haba kren mynta ka sngi, ka 13 tarik Jylliew 2025, u bah Pyniaid ula ong ba kano ka Executive Committee kaba don ha KHADC, ka dei ban don ka jingkitkhlieh, haba shimti ban synshar.
U la ong ba ka por ba long CEM ma u, la don uwei uba la trei sngi ne casual la 20 snem bad ioh jingsiew tang 5 hajar shi bnai. Ula ong ba kaba nyngkong ka long ba uba trei ha KHADC u dei ban dei u Khasi bad ka nongrim ki MDC haba ki leit ha KHADC ka long ban pynbha ban pynskhem, ym ban beh briew ne ban beh kam namar ba ym lah ban pdiang ia kane namar ba ki dei ki paradoh parasnam.
Ula ai khublei ia ka iing bishar ba don burom halor ka jingpynsangeh ia ka jingshah beh kam ki nongtrei ka KHADC.
U bah Pyniaid u la ong ba ha ka jingsngew jong u, ka jingbeh kam jong kane ka EC kaba ialam ka VPP, ka lah ban long lehse kim kot bor ban treikam bad kawei pat lehse ki pyrkhat ba lehse ba ki dei ki briew jong kiwei ki seng sain pyrthei.
Hynrei ha ka jingshem jong u, la bun ki seng sain pyrthei ki thungkam bad wat u President ka VPP u bah Ardent M Basaiawmoit ha ka por ba u long CEM mynshwa, u la thung 16 ngut.
U bah Pyniaid ula ong ba kum ka EC ka dei ban peit kaba shakhmat ym ban phai shadien bad ha ka jinglong CEM ma u, um pat ju weng briew satia.
Ka EC ka VPP kam dei ban phai shadien, kynthoh ha u bah Pyniaid ba shah weng kam ki nongtrei ka KHADC
