Shillong: Ka sawdong ka Pung Umiam, kan long ka ktem jngohkai ba pawnam bha ha ka jylla lyngba ki kam shna jong u briew, ym kum ka thain Sohra bad kiwei ki jaka, ba la buh hi ka mariang.
Ka sorkar jylla ka la pynkhreh ban pynjngi da ki liengduriaw ha pung Umiam ha kaba ki nongwankai kin ioh ban shong ban lehkman, nangta kan pyniaid ruh da ka cable car. Kham mynshwa, la buh ia u maw nongrim ban shna ia ka Hospitality Complex ba T.29 klur ha Mawlyndep.
Mynta ka kynti, ka sorkar ka la mynjur ruh ba ka tnad jngohkai kan shimti noh ia ka jaka jong ka tnad bording kaba heh 273.41 akar ha Umiam na ka bynta ban tei ia ki hotel ba heh bad kiwei ki jingtei ban khring ia ki nongwankai.
Ia kane la iathuh u nongaiktien ka sorkar u bah Paul Lyngdoh hadien ba la wai ka jingialang ka kynhun myntri.
Katkum ka jingiateh, ia ka jingmih na katei ka jaka, iasam hapdeng ka tnad bording bad ka tnad jngohkaida ka jylla. Ka tnad jngohkai kan siew T. 1 tyngka shi akar sha ka MeECL bad ka bhah kan long 90 percent na ka bynta 60 snem.
Ki jaka kiban shna ktem jngohkai ki kynthup ia ka IB campus, nang ka lad Nongsdier, ki jaka kaba don hadien ka skul ka MeECL bad ka NHRDC, ka Block V, bad ka Lumpongdeng Island.
Sawdong ka pung Umiam kum ka ktem jngohkai, yn mih ki hotel ba heh
