Shillong: Hapdeng ka jingther u slap bah Sohra hynrei kam shym la khang lad satia ia ki nongwankai pyrthei ban leit iuhkjat sha katei ka jaka kaba pawnam tam ha ka jingjur u slap ha ka pyrthei.
Ha ka jingleit u nonglum khubor sha katei ka jaka ha ka sngi Saitjain, la lap shi lynter ka surok ia ki kali kiba wankai na ka thain Sohra kila mareh khlem sangeh satia naduh ki kali nabar jylla khamtam na ka jylla Assam bad kumjuh na kane ka jylla Meghalaya. Ki jaka jngohkai ruh ki bun bha ki nongwankai lynter lynter ka surok.
Ym tang ki kali rit hynrei ki nongwankai kila tuid ruh da ki kali mini bus ryngkat kiba haiing hasem.
Ym tang ka jingjur slap, hynrei ka Sohra ka don ruh shibun ki jaka jngohkai naduh ki kshaid ki krem bad ki jingthaw ba itynnad ka mariang. Ha kum kane ka por ba jur slap lei, ki kshaid kila kyrsoi ha man ki jaka ha lynter ka surok sha Sohra bad kane ka la khring ia ki nongwankai.
Wat hapdeng u lapbah, tuid ki nongwankai sha Sohra
