Shillong: Ka jingther u slap ha kine ki ar sngi ka 29 tarik bad 30 tarik ba la dep, ka la wanrah ka jingjulor haduh 49 tylli ki shnong ha ki 10 tylli ki district bad ka la wanrah ka jingiap sha ka 6 ngut ki briew.
Ka India Meteorological Department (IMD) ka la dep ban pyntip ia kane ka jingther u slap ha kane ka jylla.
Ha ka kyrwoh ka sorkar, kiba khlad ki long u Mebanskhem Mukhim (14) na shnong Kharang kaba hap ha Mawkynrew, East Khasi Hills, uba khlad na ka jingban ka dieng kaba khyllem.
U Batgrikchi A Sangma (7) bad ka Brime D Sangma (13), na shnong Kentapara, West Garo Hills, kiba khlad na ka jingtied u pyrthat. Nangta u Nikolas Kharpran (36) uba ngam jyllop ha wah Umlew hajan ka shnong Kyrdeng ha Ri Bhoi district.
Ha East Khasi Hills ki shnong ba kham jur ka jingshah ktah ka dei ha Shella bad ha Mawshabuit, katba ha Ri Bhoi ki dei ka shnong Amjok bad Lumdiengngan.
Ha South West Khasi Hills bad ha Eastern West Khasi Hills ruh la iathuh ba bun ka jingtwa kaba la ktah ia kiba bun ki iing briew.
Ka West Garo Hills ka la shah ktah bha na ka eriong ha Rongram bad ha Dadenggre blocks.
Ka jingsam bording sha kiba bun bah ki shnong kum ha Mylliem, Pynursla, Mawsynram, bad Shella block ka la ktah bad ka MePDCL ka dang maramot ha kiba bun ki jaka.
Ka kynhun ki nongiarap ne Emergency team kynthup na ka tnad PWD, ophis ki BDO bad ka Forest and Disaster Response Unit kila shim ia ki lad ki lynti ban iarap bad maramot ia ki jingjulor.
Ki bor sorkar ki kyntu ia ki paidbah ban husiar bad phikir bha ha ka por ba jur u slap bad ka lyer khnang ban lait na kano kano ka jingma.
Syllad ka mariang kiew ka jingiap sa 6 ngut kynthup uwei ha thain Mawkynrew bad Bhoirymbong
