Shillong: Ki jylla bapher bapher ha kylleng ka ri, kila pynjur ia ka jingkyndang bad pynphai ia ki Bangladeshi kiba wan rung beain sha India.
Ki jylla kynthup ka Bareilly bad Kanpur ha Uttar Pradesh, ka nongbah Delhi, Gujarat bad Assam kila pyllong ia ka jingkyndang ia ki Bangladeshi bad ki Rohingya kiba wan sah beain khlem ki kot ki sla kiba biang.
Dang shen, u Symbud Myntri Rangbah ka jylla Meghalaya ruh u bah Prestone Tynsong ula ong ba la ai bor ha ki bor district ban thwet bad ban kem ia ki briew na Bangladesh kiba wan sah beain khlem ki kot ki sla kiba biang. Hynrei kumba long haduh mynta, ym pat ioh jingtip na ka sorkar, la ka la lap ne em ia ki briew na Bangladesh kiba wan sah beain ha kane ka jylla.
Kumba ju sakhi lyngba ki lad pathai khubor, ki BSF kila ju ioh kem man ka po ria ki briew na Bangladesh kiba wan rung beain sha India na khappud.
Dang shen, kiba la paw ba la ioh bat ki pulit ia ki briew na Bangladesh, ki dei tang ha Ri Bhoi kiba wan iaid na Assam bad uwei la ioh kem ki pulit ka Sohra.
Ka tnad kam pohiing ka sorkar India ka la buh por haduh ba kut une u bnai ban pynphai noh ia ki briew na Bangladesh kiba sah beain ha India.
Pynjur ka India ia ka jingkyndang ia ki Bangladeshi, dang kynjah ha Meghalaya
