Nongstoin: Wat ha kane ka ri secular kaba laitluid ban mane ne ngeit ha kano kano ka niam, hynrei ka Seng Khasi West Khasi Hills ka la iakynduh shibun ki jingeh na ka jingshah pyndik.
Haba kren bad u President ka Seng Khasi West Khasi Hills u bah Phriar Ryntathiang u la iathuh ba ka jingkynduh jingeh ka Seng Khasi ka long ba wat ia ka shad kaba long ha katei ka madan ha New Nongstoin ym dei ba ki ioh ia ka NoC da kaba suk ban ioh ban pyllong iaka shad. U la ong ba bun kiba don ha ka niam tynrai ha West Khasi, ban thang briew kim ioh namar ba bym shah ki shnong, bad haba ka thmu ban pyllong ia ka jingkyrkhu iing ruh, ki don ki shnong ki bym shah.
U bah Phriar ula ong ba shisien pyrkhat ba kane ka dei ka Shad Suk Mynsiem hynrei ym sngew dei ban ong ba ka dei ka shad shisha ha kata ka mynsiem kaba da hun, namar ba ki don jingpynwit kiba bun.
“Shisien pyrkhat ba ka dei ka shad suk mynsiem, kam dei ban ong ba ngi shad shisha ha kata ka mynsiem kaba da hun, balei ngi ong kumta, namar ba wat ia ka shad kaba long hangne ha madan, ym dei ba ngi ioh ia ka NOC kaba suk ban ioh ban pyllong iaka shad, bun kiba don ha ka niam tynrai ha West Khasi, ban thang briew kim ioh bym shah ki shnong, ka jingkyrkhu iing ki don ki shnong ki bym shah”, la ong u bah Phriar.
Ka Seng Khasi West Khasi Hills ka la pynkut ia ka Shad Suk Mynsiem 2025 ha ka sngi Nyngkong, ka 26 tarik Jymmang, ha Nongstoin hapdeng ka jingiphuh iphieng wat hapdeng kiba don ha ka niam tynrai kila kham duna ha katei ka thain.
Ka Shad Suk Mynsiem ka dap artad 25 snem naduh ba la sdang ia ka ha 2000 ba kaba ka bor district ruh ka ju ai shuti ha kane ka sngi.
Ha West Khasi don 5 tylli ki shnong kiba dang bun kiba don ha ka niam tynrai hynrei ha kiwei ki shnong ki la kham duna.
U bah Phriar u la ong ba kane ka shad kam dei ban pynkylla ne bein ia kiwei, hynrei ka dei ka nongrim ba ka jaidbynriew bri hynniewtrep kumba la seng u longshwa manshwa.
Ym dei ba bein ia kiwei, hynrei ka dei ka jingsngewthuh bakla kito kiba la kylla, kiba pyrkhat da kumwei bad ula ong ba kum ki Khasi kim dei ban sngewthuh bakla ne ban isih.
“Kane ka shad kam dei ban pynkylla ne bein ia kiwei, hynrei ngi shad ka nongrim ba ka jaidbynriew ha ka bri hynniewtrep kumba la seng u longshwa manshwa”, u la ong.
U la bynrap, “Ym dei ba bein ia kiwei, hynrei ka dei ka jingsngewthuh bakla bad kito kiba la kylla, ki pyrkhat ba ka dei kaba sniew, ha kaba kim shah ban thang briew, ha kaba ki ju wan khang bad ka jaka thang ha Nongstoin ruh la ioh ban shna hadien ba la ialeh mukotduma.
Kum ki Khasi kim dei ban sngewthuh bakla ne ban isih da ka jingsngewthuh jingmut, ym ban shah ialam bakla”, ula ong.
Hapdeng kine ki jingtynjuh, ka shad suk mynsiem ka West Khasi Hills ka la nang phuh nang phieng da ka jingwan iashim bynta ki parakur parakha.
Kynduh jingeh ka Seng Khasi WKH, ban leh niam, wat ban shad jynjar ban ioh NoC
