Shillong: Ka shad Khasi ka Seng Khasi Umlyngpung 12 Mer ka la iaid la bun snem bha mynta naduh mynshwa mynnor.
Ka Asst. Secretary ka Seng Khasi Umlyngpung 12 Mer, ka Kong Veronica Ibapynhun Nongkhlaw, ka la ong ba ia kane ka shad la pyllong mynshwa ha u lum Kynto hynrei naduh ba la shimti noh ka Seng Khasi la rah sha ka madan kaba long mynta.
Ka Seng ka la pynkhreh ruh ban rakhe ia ka jubili rupa ha ka jingiaid lynti jongka ha kine ki phew snem kiba la leit hapdeng ka jingtynjuh kiba bun.
Naduh ba la shimti ka Seng Khasi, ka shad ka kmen ka la nang phuh nang phieng ha kaba ki parakur parakha na kylleng ki jaka, kila wan ban iashim bynta ha ka shad ka kmen bad mynta ka sngi ka 25 tarik Jymmang, 2025, ka la sakhi ia kane, ha kaba ki nongshad kynthei bad shynrang kila tuid ban iashim bynta.
Ka Kong Veronica ka la ong ba ha kane ka shad, la pdiang ia kiba dang bat dang ksoh ha ka niam Khasi tynrai.
Ha kajuh ka por, kala pynpaw ka jingkmen lada kito kiba la kylla, kin wan phai biang sha ka jingngeit niam Khasi kaba dei ka tynrai, kumba maka ruh ka dei kaba la wan phai biang sha ka niam tynrai.
Ka long kaba sngew kmen eh lada ki wan phai pat sha ka tynrai ha kaba maka ruh, ka dei kawei napdeng kiba la wan phai sha ka niam tynrai lyngba ka jingsngewthuh ka mut aiu Khasi, bad uei u Khasi. Halor kane, ka shim ia ki lai tylli ki mawbyrsiew, ka tip briew tip blei, tip kur tip kha bad kamai ia ka hok. Ha kine ki snem, la don ruh ha kine ki sngi kiba la dep, kiba la wan phai biang sha ka niam tynrai.
Ha ka Shad ha Umlyngpung 12 Mer, kmen lada kito kiba kylla kin wan phai biang, ong ka kong Veronica
