Shillong: Ka Siliguri Corridor ha North West Bengal, la ju khot kum ka Ryndang Syiar ka India ne “India Chicken’s Neck”. Kane ka mat ka la khluit bha puk ha India hadien ba u Interim Chief Adviser ne u Defacto Prime Minister ka Bangladesh u Muhammad Yunus ula ong ha ka por ba u leit sha China, ba ka North East ka dei ka jaka kaba ker da ki lum ki riat bad ka Bangladesh ka long kum ka nongiada ha lynti duriaw ban iaid lynti namar ba ka North East kam don ka duriaw.
Balei ki khot ia ka kum ka ryndang syiar, ka daw ka long namar ba ka dei ka lynti kaba khim bha kaba pyniasoh ia ka India bad ka North East, kaba long kum hapdeng ka Khlieh Syiar ia ka Nort East kaba don 8 tylli ki jylla bad ka Met Syiar ia ka ri thor ne ka Mainland India.
Kane ka jaka ka long ruh kaba kongsan bad kaba donkam bha ia ka India namar ba ka don ruh hapdeng ka jingsyier ia ka India, na ka jingdon shibun ki khappud kynthup ka shathie ka Bangladesh, shatei ka Nepal, bad Bhutan sha mihngi.
Ka jingiar kane ka ryndang syiar ka long kumba 20-22 kilometer bad ka jrong kumba 200 kilometer.
Ka jingkren u Chief Adviser ka Bangladesh u Muhammad Yunus ha ka por ba u don ha China bad ka jingthmu ka Bangladesh ban ot noh ia kane ka ryndang syiar ban ioh klun ia ka North East, ka la mih ka jingkhluit tar ha ki briew ka India. Ka India ka la pyrkhing mynta ia ka jingiakhïi pateng bad ka Bangladesh da kaba khang ban wanrah ia ki katto katne ki mar, bad kane ka la ktah jur ia kiba bun ki kompeni bad ki nongkhaïi ha Bangladesh.
Ha ka bynta jong kane ka Ryndang Syiar, ka India ka la pynjur bha ia ka jingpahara ki bor shipai.
Ka jingpyniakhlad ia ka India bad ka Pakistan ha u snem 1947, ka la pyllong ia ka Siliguri Corridor lyngba ka jingthaw ia ka East Pakistan (Bangladesh mynta) hadien ka jingphiah ia ka Bengal sha ka East Bengal bad ka West Bengal ha u snem 1947–1948.
Ha ki bynta jong kane, ka India ka la theh bun ki kam pynroi kynthup ka jingshna surok, ka jaka dem ki helicopter ne ka Advance Landing Grounds (ALGs) namar ba ka dei ka strategic corridor ha kaba iadei bad ka jingshngain jong ka ri.
Kane ka ryndang syiar ka long kaba syier bha ia ka India namar ka jingma na ka China kaba la iakhun thma teng bad ka India ha u snem 1962. Kumjuh ruh na ka Bangladesh, kaba kwah dik dik ban ioh ot ia u ryndang syiar ka India ban ioh klun ia ka North East.
Namar ba ka dei ka jaka kaba shong syier bha, ka India ka shna ktem kaba khlain bha ha katei ka jaka, ha kaba ka la buh da ki shipai ryngkew, ki shipai suin ryngkat ki tiar ialeh kiba khlain kum air defence systems, ki namding BrahMos, ki Rafale Fighter Jets ha Hasimara Air Force Station.
Ka jingkren u Muhammad Yunus ba ka North East ka dei kaba shah khang ha ki lum bad ki maw bad ka Bangladesh ka long kum ka nongiada ia ka lynti ban iaid lyngba ka duriaw, ka la wanrah ka jingkhia jingmut ia ka India, kaba la iohi ia ka jingpyrshang ka Bangladesh ban ioh klun ia ka North East da kaba pan jingiarap na ka China ne wat ka China da kaba pyndonkam ia ka Bangladesh.
Kwah ot Ka Bangladesh ia ka Ryndang Syiar ka India| Siliguri Corridor
