Shillong: U Interim Chief Adviser ne u Defacto Prime Minister ka ri Bangladesh u Muhammad Yunus u lah ban risain noh na ka shuki hadien kumba 9 bnai eiei mynta hadien ba ka la mih ka jingiakynad kaba jur bha bad u heh shipai Army Chief General u Waker uz Zaman bad ka jingbym don ka jingiatreilang jong ki seng sain pyrthei.
Katkum ka khubor, u Yunus ula pynkhreh da ka Charter Flight ban her wut sha France lada jia ba ka mih kano kano ka huri hura ne lada u shah kthong kumba kthong ki paidbhur ia ka Sheikh Hasina.
Ka khubor kaba dang shu wan shen, ka la ong ba u Yunus ula pyrkhat ban hiar shuki noh hadien ba u shem jingeh ban wanrah ia ki seng sain pyrthei bapher bapher ha ka jingialong kawei.
Ki jingeh ia u Yunus ka long ba naduh ba u shimti ia ka kam, ka kamram ba hakhmat eh jongu, ka long ban pynthymmai ia ka rukom pyniaid ia ka elekshon bad ban pyllong ia ka elekshon ban jied ki paidbah ia ka sorkar. Hynrei ka jingmih ka jingiapher jingmut hapdeng ki seng sain pyrthei bad ka jingiakynad bad u heh shipai Army Chief General u Waker uz Zaman, ka la buh jingeh ia u.
Kane ka jingiapher jingmut, ka la paw pyrthei bluit hadien ba ki seng sain pyrthei kiba pyrshah ia ka Bangladesh National Party (BNP) jong ka Khaleda Zia, kila mih paidbah ban pyrshah ha surok ha Dhaka.
U nongialam ka seng National Citizen Party (NCP) u Nahid Islam ula ong ba lada u Yunus um lah ban leh ia kam kumba la bynshet, ka bha ba un risain noh.
Kane ka jingmih ka kynrum kynram ka la pynktha khlieh ia u Yunus uba la poi ka jingpyrkhat ba un ieh noh ia ka shuki.
Ka party Bangladesh Nationalist Party (BNP) jong ka Khaleda Zia kaba ju iakhun mar kynti bad ka party Awami League jong ka Sheikh Hasina kala dawa ban pyllong ia ka elekshon ha u Nohprah mynta u snem 2025 katba u Yunus u la thmu ban pyllong haduh u Jylliew lashem snem 2026.
Kane ka party ka Khaleda Zia ka la byrthen ruh ban weng noh ia ka jingkyrshan ia ka sorkar shipor kaba ialam u Yunus.
Na ka liang u Yunus u kwah ban pynbeit shwa ia ki kynrum kynram shwa ban pyllong ia ka elekshon namar ba lada pyllong ha kum kane ka por, kan long kaba eh ban pyniaid beit iaid ryntih ia ka elekshon, ha kaba ka lah ban wanrah ia ka jingleh tuh bad thombor ha ki jaka thep vote bad lada ym lah ban pyniaid ia ka elekshon kaba beit ka ryntih, un sa shah takrain.
Ha kajuh ka por, ka National Citizen Party (NCP) kaba pyllong ia ka jingialang pyrshah ha ka sngi Balang, ka la kynnoh ba ka Election Commission ka Bangladesh, ka la iashah shiliang sha ka party BNP jong ka Khaleda Zia.
Ka la kynnoh ba ka ophis jong ka Bangladesh’s Election Commission ka long kum ka ophis ka BNP bad ka la dawa ban thaw thymmai ia ka Election Commission.
Katkum ka khubor, lada u Yunus um kohnguh, ki shipai ki lah ban knieh ia ka bor, ne u lah ban risain ne u lah ban shah weng jubor.
Hato yn risain noh u Yunus kum u Chief Adviser ka Bangladesh
