Shillong: Khlem pep ka thain Nongspung, East Khasi Hills kan khring bha ia ki nongwankai lada kin ioh sngew ia ki khana bad ki jingbuh ka mariang kiba khampher ha katei ka thain.
Katkum ka jingiathuh u sordar ka Nongspung bah John Worthborn Kharmydai bad u Syiem ka Hima Nongspung bah Kyntiewbor Syiem, ki dang don ki dak ki shin haduh mynta katkum ka khana, ba ka kmie u Lum Kyllang bad u Lum Symper ka don ha Nongspung bad ka dang jaw ummat haduh mynta na ka jingialeh markynti ki khun jongka, kata u Kyllang bad u Symper, kiba la phet noh na la iing.
Ha kane ka jaka kaba long lum kaba shong ka kmie u Kyllang bad u Symper, la khot kum ka Mawsohkrih bad na une u lum lah ban iohi shynna ia ka Mawkyrwat bad ka Mairang.
La iathuh ba ka thain Nongspung ka don ruh u mawheh uba itynnad bha uba ju dem u bsein iong radbah bad ka met jong u ka don ha u maw kaba la dkut noh na ka jingpom u pyrkhat hyndai. Shuh shuh la don ruh u maw ba khot Lyngdoh jiapjhok kaba ju mih ki sniang bad ki jah ruh hangta hi bad ki don ruh kiba dang iohi haduh mynta ia kane.
Ka don ruh ka krem bret briew ha kaba hyndai lada don mano mano ba leh tam, ki bret bad tep im ha kane ka krem.
Shi bynta ban pynlong jaka jngohkai ia kine, mynta ka sngi, kila pan jingkyrshan na ka sorkar lyngba u myntri ka tnad jngohkai u bah Paul Lyngdoh bad kyrmen ba ka sorkar kan shim khia halor kane.
U sein iong radbah, ki sniang ba mih na u maw, ka krem bret briew ha Nongspung
