Shillong: U MP ka Tura u Saleng A Sangma ula ong ba ym lah ban tip ba ka India ka lah ban mih sa kawei ka jingiakynad bad ka ri Bangladesh ruh haba peit ia ka jinglong jingman kumba ka long mynta.
Haba kren mynta ka sngi, u Saleng ula ong ba ka India ka don ka jingiakynad bad ka Pakistan bad kumjuh bad ka China bad ym lah ban iathuh lypa ba ka lah ban mih ka jingiakynad bad ka Pakistan ruh.
U la ong ba wat hadien ka jingiakut ban sangeh iasiat hapdeng ka India bad ka Pakistan hynrei ka dang don ka jingiasiat. U pud u sam ka India bad ka Bangladesh, u iar naduh Meghalaya, Assam, Tripura bad ka donkam ban pynsted ia ka jingker sainar shiah.
U la ong ba ka jingrung tuh ki briew na Bangladesh sha India ka dang iai jia man ka sngi bad la dep thoh sha ka tnad kam pohiing ka ri, ban pynkhlain ia ka rukom pahara ki BSF ha khappud bad ban pynsted ia ka jingker sainar.
Lah ban mih sa ka jingiakynad bad ka Bangladesh hadien ka Pakistan, ong u Saleng
