Shillong: Ka lynti kulai kaba u ju iaid u David Scott ha kato ka por kaba mih lyngba sha Umsning, Ri Bhoi, ka dang don haduh mynta ha shnong Bangla Sohphie. Ia kane ka lynti kaba suh arted sha them ban poi shaduh Assam ha kito ki por, lah ban iohi shynna kyndiar na u lum Mawjniun kane ka shnong Bangla Sohphie.
Na une u lum Mawjnuin lah ban iohi shynna ia ki them Bhoi kaba pyniap biej ia ki khmat jong ka jingitynnad ka mariang, khamtam haba beh ka lyer batesi batemon hir hir, ka pynkyndeh ia ka mynsiem jingkmen bad ka pynkhuid iaka jingmut jingpyrkhat.
Ka shnong Bangla Sohphie ka don ka jingthmu mynta, ban pyllong jaka jngohkai ia une u lum nalor ka jingdon kiwei ki jingbuh jingsat ka mariang kum ka kshaid Thup Thup, ksaid Khudoi, kshaid Kohmang, bad kiwei kiwei.
U Sordar ka shnong bah Albinus Mawlong bad u dkhot ka shnong bah Arius Basiawmoit kila iathuh ba ka shnong ka la pynkhreh ban phaikhmat noh sha ka kam jngohkai ban khring ia ki nongwankai namar ba ka shnong ka don shibun ki jingitynnad jong ka mariang khnang ban kyntiew ia ka ioh ka kot jong ki nongshong shnong.
Na u lum Mawjnuin iohi shynna ia ka surok kyllain u David Scott ban poi sha Assam
