Shillong: U myntri rangbahduh ka ri u Narendra Modi mynta ka 13 tarik Jymmang, 2025 ula hiar sha ktem ki shipai suin ka India ha Adampur, kaba don ha Punjab ha kaba ka Pakistan ka la kam ba ka la ioh ban pynpra ha ka jingther jongka dang shen.
Hynrei kane ka jingkam ka Pakistan ka long tang ka jingkren lamler namar ba katei ka ktem shipai suin ka India kam lei lei satia hynrei, dei ka India kaba la siat pynhap ia ki spah tylli ki drone ka Pakistan kiba wan her sha katei ka jaka.
Kane ka jinghiar u Modi ban leit kynduh ia ki shipai suin ha katei ka jaka ka long ban ai mynsiem ia ka jingshlur bad ka jingaiti lut jongki ban iada ia ka ri ha ka jingiakhun pyrshah ia ka Pakistan dang shen.
Haba kren hakhmat ki shipai kiba ialum khrui ha katei ka Air Base ka India, u Modi u la ong ba ki riew pyntriem ki shaniah ha ki shipai ka Pakistan, hynrei ki shipai ka India, naduh ki shipai suin, ki shipai ryngkew bad ki shipai duriaw kila lko syndon pom.
Ula ai burom shi katdei eh ia ki shipai suin ka India ba kila pyni ia ka jingtbit ha kaba kila pyni ha ki shipai ka Pakistan ba ym don jaka shuh ia ki lehnoh ban shong bad ban ring mynsiem da ka jingsuk.
Haba maham ia ka Pakistan ba ka India kan leh da ki kam ba kham tyngeh, u Modi u la ong ba ka India kan leit rung syndon haduh ki iing ki sem ki riew pyntriem bad khyrwit bad kan ym aili shuh ba kin lait phet. Ula ong ba ki namding, ki drone ka India kin pynduh thiah pynduh dem ia ka Pakistan da ki sngi bad ki sngi.
U la ong ba ka Operation Sindoor ka dei ka India kaba thymmai ban khyrwit ia ki riew pyntriem.
Ula iaroh ia ki shipai ka ri naduh ki Army ne shipai khyndew, ki Air Force ne shipai suin bad ki Navy ne shipai duriaw, kiba la pyni ia ka jingtbit bad ka jingkhlain ha ka jingiakhun pyrshah ia ka Pakistan
Im Slem India, pyrta jam ki shipai suin bad u Modi por ba leit jngoh u Modi ia ka ktem shipai suin kaba kam pynpra ka Pakistan
