Shillong: U Lat ka jylla Meghalaya mynta ka sngi 10 tarik Jymmang, 2025, ula lum ia baroh ki nongialam jong ki niam bapher bapher ha Raj Bhavan, Shilong ban long kiba iatylli kum kawei ha ka ri.
Ha kane ka jingialang, la wan ban iashim bynta ki nongialam niam bapher bapher ba kynthup ia u Nabha Bhattacharya – Vice President ka Meghalaya All Faiths Forum bad u President ka Central Pooja Committee, Shillong, Rev. Ellizer N Sangma ka Garo Baptist Church, Rev GPL Gadew na ka Presbyterian Church, Shillong, bah Ganesh Dkhar na ka Seng Khasi, u Sayidullah Nongrum u President ka Meghalaya Muslim Forum, Dr. Shngain Pyrbot u General Secretary ka Sein Raij, Shillong, u Father Staibok Warjri na ka Balang Catholic bad ki nongmihkhmat na ka Ramakrishna Mission.
Ha ka jingialang, la ioh ruh ia ka jingkren na u Myntri Rangbah u Conrad K Sangma lyngba ka video na Delhi.
Na ka liang u Chief Secretary ka Meghalaya u bah Donald Wahlang ula ban jur ia ka jingiatylli ha ka ri da kaba ong ba ka ka ri wan nyngkong bad ula pynpaw ka jingsngewnguh ia u Lat uba la khot ia kane ka jingiakynduh bad ia kiba wan ban poi lang baroh. La ioh ruh ka jingkren na u myntri sorkar jylla u Rakkam A. Sangma uba pynpaw ba ka ri ka dei ia baroh ki briew ka India bad ula kyntu ban duwai ia ki shipai kiba iada ia ka ri. Kumjuh u myntri sorkar u A.T. Mondal ula ong ba ki kam pyntriem kim don jaka hangno hangno ruh ha kane ka ri.
Baroh ki nongialam niam kila pynrem ia ka jingjia ha Pahalgam bad kila kyrshan ia ki shipai ka India kiba la khyrwit pyrshah ia ki lehnoh da ka ‘Operation Sindoor’.
Haba kren ha kane ka jingiakynduh, u Lat ka jylla u la pynpaw ia ka jingsngewnguh ia kiba la poi khnang ha ka jingkhot jong u. Ula pynrem ia ki kam pyntriem ha India bad sha kano kano ka jaka ha ka pyrthei. Ula iaroh ia ki nongialam niam kiba la ai ka jingkyrshan ia ka ri bad ula ban jur ban don ka jingiatylli, ka jingiaieid, bad ka jingiaburom mar kylliang khlem da niew ia kano kano ka jingngeit niam hynrei ban ieng tylli kum kawei ha ka ri.
U la ong ba ha kum kane ka por jong ka jingtynjuh ha ka ri, ka donkam ban iatylli, ban pynneh ia ka shongsuk shongsain ban pynskhem ia ka jinglong kawei ha ka ri.
Kum ka dak ka jingai burom ia kiba khlad noh, la sngap jar ruh 2 minit.
Iatylli ki nongialam niam ka Meghalaya ban kyrshan ia ki shipai ka India halor ka Operation Sindoor
