Shillong: Ka Pakistan ka la hap ban pyndem noh ha ka jingiakhun bad ka India hadien ba kam sngew lah shan shuh hadien ba ki shipai ki swar bad ki tup ki man kiba pynkhreh ha suin bad ha ryngkew kila tlot iar na ka jingshah khyrwit ha ka India.
Haba kren sha ki lad pathai khubor mynta ka janmiet ka 10 tarik Jymmang, 2025, ki heh shipai ka India kynthup u Air Commodore u NP Nair, ka colonel ka Sofiya Quereshi, bad ka Wing Commander ka Vyomika Singh kila ong ba ha kine ki khyndiat sngi, ka Pakistan ka la pyrshang ban pynsaphriang da ki khubor lamler ba ka la pynhap khyndew ia ki jet ka India, ka jingpynjot ia ki ktem shipai suin ka India hynrei ha ka jingshisha kim dei kiba shisha. Ka jingkynnoh ka Pakistan ba ki shipai ka India ki pynpra ia ki mosque ruh ka dei kaba lamler suda namar ba ki shipai India ki burom ia baroh ki jaitniam bad kam don kano kano ka jingthmu ban pynjot ia ki jaka mane jong kano kano ka niam bad ka jingther bom ka dei tang ia ki ktem jong ki lehnoh.
Ha kine ki khyndiat sngi, ka Pakistan ka la duh bad julor bun ha ka liang ki tiar thma ha khyndew bad kiba pyndonkam ha suin ruh. Ka jingjulor ka radar ka la long kumba kdiah ia u budlum jingtip jong ka Pakistan haduh ba ka la wanrah ka jingeh kaba shyrkhei ia katei ka ri.
Kane ka jingkynduh mawsiang, ka la pyllong ia u heh shipai ka Pakistan ban phun kyrkieh sha u heh shipai ka India ban sangeh noh mardor ia ka jingiasiat naduh mynta ka janmiet 10 Jymmang, 2025.
Ha kajuh ka por, u President ka America u Donald Trump u la thoh ha ka social media page jong u ha ka X ba lyngba ka jingtuklar ka America ban iakren pyniasuk ia ki heh sorkar India bad ka Pakistan, ka jingsangeh iasiat ka la urlong.
Bym sngew lah shan shuh ha suin ne ha khyndew, pyndem noh ka Pakistan
