Shillong: Ka Pakistan ka la pynher kumba 300-400 tylli ki drone kiba kit tiar lum jingtip bad syntiat ia ki jaka ha India khnang ban ther ia ka India bad kane ka jia ha ka thain khappud ha ka miet 8 tarik Jymmang 2025. Katkum ka khubor na ki shipai ka India, kine ki drone kiba pyndonkam ki shipai ka Pakistan, ki dei kiba la shna da ka ri Turkey.
Ki shipai ka India kila ong ba kine ki drone ki shipai ka Pakistan, kila shah pynhap khyndew noh ha ki shipai ka India. Ka Pakistan ka pynher ia kine ki drone ha ki bynta u Line of Control bad ki bynta khappud ka India bad ka Pakistan.
Hynrei ki shipai ka India kila pynhap ia kine ki drone ka Pakistan ha ki 36 tylli ki jaka ka India. Ki shipai ka Pakistan kila pyrshang ban hiar thma ha ka ktem shipai ha Bathinda, Punjab ka India hynrei ki shah pynher krad ha ki shipai ka India bad ka India ka la pynher kylla da ki drone ba kit tiar pynbthei ha ki 4 tylli ki ktem shipai suin ka Pakistan bad uwei u drone ula pynlko ia ka Active Directory Database (AD) radar ka Pakistan.
Ha kajuh ka por, uwei u shipai India ula kyllon iap bad mynsaw ki riew paidbah ha ka jingther ka Pakistan ha thain Uri, bad kiwei ki jaka ha thain Jammu bad Kashmir. Hynrei na ka liang ka India ka la jubab kylla ha kaba ka la don ka jingjulor kaba jur sha ka liang ka Pakistan.
Lah ban kdew ba ka India kala hiar thma ia ki ktem lehnoh ha Pakistan da ka Operation Sindoor hadien ka jingshah siat iap 26 ngut ha Pahalgam.
Pynher ka Pakistan kumba 300-400 tylli ki drone ka Turkey, pynhap khyndew noh ki shipai India
