Pynursla: Ka thain riwar Pynursla kaba la jah kyrteng ha ki bun phew snem ha ka kyrdan top ten ha ki eksamin ka Meghalaya Board of School Education (MBoSE), hynrei ha kane ka kynti, kala paw biang.
Kane ka jingpaw ka thaiñ riwar Pynursla ka dei na ka samla Mebalaaihun Mawiong kaba la poi ha ka kyrdan ba phra ka top ten ka result klas XII ka Arts Stream na ka Asorphi Higher Secondary School, Pynursla. Ka la khur 441 mark bad ka ioh distinction 6 tylli ki sobjek.
Na ka liang u nongthoh khubor, ula ioh ban iakren bad kane ka samla, kaba la pynpaw ba u shabi sha ka jingjop, ka dei na ka jingtrei shitom bad ka ai ka burom ia ki kmie ki kpa, ka skul, ki nonghikai bad ka thain riwar baroh kawei. Ka samla Mebalaaihun ka dei na shnong Nongkwai kaba don harum ka Pynursla.
Ka la iathuh ba wat hapdeng ka jingduk ka jingeh, hynrei ka don ka jingkut jingmut ba ka dei ban trei shitom ban poi sha ka thong. Kane ka samla ka don 6 ngut shi para bad ka dei kaba khadduh bad ka sah bad ki hymmen jongka ha Pynursla katba I mei I pa ki don sha shnong ha Nongkwai.
Ka la ong ba kam ju buh kynta ban khreh kot hynrei ka ka por ba ka pyllut por ban khreh bad pylleit jingmut ka dei ha ka por ba kham kynjah kum ha ka por mynstep bad mynmiet.
Kane ka samla ka don ka jingthmu ban pule kham shalor bad ban pynkhreh ia ka eksam Civil eksamination.
Ka la ai mynsiem ia ki samla khamtam ki para kynthei ba kin ym ngop ha ki jingpynshoi ka pyrthei mynta hynrei ki dei ban don ka jingiaishah bad ka jingaiti haba ki don ka thong ha ka jingim. Kane ka samla kam don mobile hynrei ka pyndonkam ia ka mobile ki hymmen tang haba ka donkam ha ka jingpule.
Khlem nud peit ka samla ba poi top 10 por ba mih ka result klas XII
