Shillong: Ka seng jong ki nongtrei iing briew ka All Meghalaya Domestic Workers Union hapoh ka shatri jong ka National Domestic Workers Movement mynta ka sngi 1 tarik Jymmang, 2025 ki la dawa ba ki dei ban don noh la ka jong ka Welfare Board kaban khmih kyrpang na bynta ki nongtrei iing.
Haba kren sha ki lad pathai khubor ka nongialam kane AMDWU ka kong Rachel Mawthoh ka la iathuh ba haduh mynta ka jingdon jong ki nongtrei bylla iing briew kiba la pynrung kyrteng hapoh kane ka Union baroh ki don 25000 ngut.
Ka kong Racheal kala ong ba ka jingdon jong kane ka seng ka la lah ban iada bad ban pynioh ia ka hok jong baroh ki nongtrei iing briew. Namarkata ka la kyntu ruh ia baroh ki nongtrei iing briew ba trei shabar ka jylla ba kidei ban pynrung kyrteng khnang ba kin lait na ka jingshah banbein.
Ka seng ka la pynkynmaw ruh halor ka jingjia dang shen, ha kaba ka la don ka jingshah banbein jong kawei ka longkmie kaba trei iing briew ha Nagpur bad lyngba ka jingdon ka KSU la lah ban iada ban pyllait ia katei ka longkmie na ka jingshah thombor.
Dawa Welfare Board ki 25 hajar ki nongtrei iing briew
