Shillong: Ka kynhun Myntri ka Sorkar Jylla ka la mynjur ban thaw ia ka kam Director ka Civil Defence ha ka Directorate of Civil Defence and Home Guard.
U Myntri sorkar jylla uba dei ruh u Nongaiktien ka Sorkar Bah Paul Lyngdoh ula ong ba ka sorkar ka la rai ban pynkylla ia ka Service Rules ka Directorate of Civil Defence and Home Guard ban pynkha ia ka kam Director of Civil Defence kaba pyniaid mynta da u Commandant General ka Home Guard.
Khnang ban lah pynjanai ia ka jingtreikam jong ka Tnad Civil Defence bad Home Guard, ka kam Director of Civil Defence kan long mynta kum kawei pat ka kam. Kane kan plie lad ia ki Joint Director, kiba la shakri ym duna ia ka 3 snem ba kin kiew sha ka kyrdan Director bad kan ai mynsiem ruh ia ki Ophisar kiba la don ka jingshemphang bad jingstad ha ka jingshakri ha ka tnad.
Ha kajuh ka por, ka Sorkar Jylla kala mynjur ia ka Meghalaya Ayush Medical Service Rules, 2025.
Haba pyntip sha ki lad pathai khubor, u Myntri Sorkar Bah Paul Lyngdoh ula ong ba ki rukom ai jingsumar tynrai kum ka Ayurveda, Homeopathy, Yoga, Naturoathy ki dei kiba la khring bha bad ba la jied da ki paidbah kum kawei pat ka rukom sumar ba mynta.
Kumta, ka Sorkar kala rai ban don noh ia ka Service Rules bad yn khot ia ka da ka Meghalaya Ayush Medical Service Rules, 2025, ula bynrap.
Thaw ka sorkar ia ka kam Director ha ka Directorate of Civil Defence and Home Guard
